Ta deseá e hóbennan hopi éksito!

WILLEMSTAD- JÜLI 2018: E aña aki ta selebrá 5 aña di Art Rules i Banco di Caribe ta mashá orguyoso di por duna aporte na un proyekto ku a demostrá kresementu kontinuo. Sosten i partisipashon na proyektonan ku ta dediká na formashon artístiko di e hóben semper a forma parti di e maneho di patrosinio di Banco di Caribe. “Nos ta haña ku ta importante pa enkurashá partisipashon di nos hóbennan na artenan ekspresivo. Nan mester ta liber pa hasi esaki di e manera ku mas nan ta sinti komfortabel. Esaki ta promé aña ku nos lo eksperensiá Art Rules di serka i nos ta mashá entusiasmá pa mira kon e hóbennan lo desaroyá nan mes durante di e proyekto,” esaki di akuerdo ku sr. Fons Simon, CEO i General Managing Director di Banco di Caribe.

Awendia, hóbennan tin tutor digital pa siña nan baile, músika i teatro. Loke ta hasi Art Rules asina interesante ta ku tin instruktor profeshonal di diferente parti di mundu na Kòrsou pa duna e tayernan. Esaki riba su mes ta trese un bunita interkambio kultural na unda e hóben ta siña diferente estilo pero den su arte spesífiko. Durante 2 siman lo enfoká riba baile, teatro, músika, skibimentu kreativo i trahamentu di pelíkula. Banco di Caribe ta kompartí e vishon di Art Rules; kultivá talento artístiko nobo i desaroyá esnan ku ya kaba a keda deskubrí. Tur esaki miéntras ta forma e hóben sosialmente i artístikamente. E aña aki mas hóben lo partisipá atrobe na Art Rules. E tayernan lo tuma lugá na Kura di Arte i lo dura te 4 di ougùstùs próksimo. Na final di e 2 simannan, e hóbennan lo tin un presentashon durante kua nan lo demostrá na pueblo di Kòrsou tur loke nan a siña. Banco di Caribe ta deseá e instruktor- i e hóbennan hopi éksito.