WILLEMSTAD, Durante e siman di 2 pa 7 di desèmber Luna Blou & La Tentashon ta bai tin presentashon di 7 obra. E aña aki Festival Historia Nobo ta bai tin un total di sinku historia dramatisá i dos obra teatral. Nan lo presentá riba diferente dia durante e promé siman di desèmber. Dia 2 lo bai tin un Meet & Greet kompletamente grátis kaminda públiko lo por presensia un resúmen di e Historianan ganadó ku La Tentashon a produsí e último 6 aña nan manera Mara bo por Muri, Hudas, Ai i Sanger di mi Sanger su Sanger. Tambe lo presentá algun pelíkula di Raymi Sambo, un yu di Kòrsou ku ta triunfando na Hulanda i a gana vários premio. Tambe bosnan lo sera konosí ku e eskritornan di Festival Historia Nobo i ku lo kompetí e aña aki pa saka e mihó Historia ku lo bira un obra teatral òf pelíkula. Dia 3 ta kuminsá shet’or di anochi na La Tentashon ku e presentashon di: Altijd Alleen Gestaan di Linaycha Martina, dirigí pa Ellon Donker. E historia aki ta bai tokante di Emma un mucha muhé ku ta wòrdu tenta na skol i pakolmo su mayornan no ta wòri kuné. Un dia e ta kai flou i nan ta hib’é hospital. Akinan dòkternan ta konstatá ku Emma ta malu. Kiko lo pasa ku Emma su salu i e situashon na skol i kas?  Despues di e historia aki tur hende ta mobilisá pa Teatro Luna Blou kaminda lo tin Generatie Steen di Tessa Snoeren bou di direkshon di Shudeska Cicilia. E historia aki ta bai tokante di un maldishon di amor ku ta pèrsigui un famia di generashon pa generashon. Liza tabatin un amor platoniko ku Eduard. Liza a stòp ku e relashon pero Eduard tabata ke mas, esaki a maldesi Liza. E amor, vengansa, i odio a haña e forma di un pieda. Huntu ku e historianan aki lo tin presentashon di e finalista nan di Luna Yen ku tambe lo presentá. Dia 4 lo kuminsá shet’or di anochi na La Tentashon. E promé Historia riba e dia aki ta Dancing Past The Grave di Nataly Burgzorg, dirigí pa Lionel Lacruz. Nataly su historianan ta kategorisá komo suspenso i teror. Dancing Past The Grave ta bai tokante di un hòmber ku ta sufri di “Necrothilia” esei ta un enfermedat mental kaminda hende ta sinti su mes atraé pa hende morto. Despues di e historia aki ta sigui: Auksilio nan ta bida den ki kas di Mahalia Jansen dirigí pa Edion (Loloy)Booy. Frank ku Marlen ta un pareha basta grandi ku a traha hopi aña duru, pa nan a yega na nan kas.  Un dia nan ta disidí di bai ku fakansi i nan ta laga nan yu Tony na enkargo di e kas. Tur kos tabata bai bon  te na momentu ku Tony su kasa ke sèn pa e bai afó bai operá su pechunan i chupa vèt. Aki Tony ta disidí di hür e kas di su mayornan. Pa finalisá e anochi lo bai tin Penny un obra skibi pa Lucette Kwidama i dirigí pa Juni Aniceta. E historia ta basa riba un hende muhé humilde ku a hañ’é ta pasa den e momentunan di mas difísil di su bida. Su nòmber ta Ester pero na momentu di kambionan dramátiko aki su nòmber ta kambia bira Penny! Ester a kuminsá sinti ku e no ta bal nada mas, su famia i amigunan tambe a hala atras. Despues di kada historia lo tin presentashon di hóbennan di Luna Yen 2013. Dia 6 ta bai tin Festival Historia Nobo Award. Riba e dia aki lo saka e ganadó di Historia Nobo 2013. Dia 7 ta bai tin e estreno di Ta Bo Destino e obra ganadó di FHN 2012. Ta Bo Destino ta  skibi pa Gedeon Martina i dirigí pa Donovan Benett.  E obra aki ta bai tokante di un mama, Wendy ku mester traha duru pa kria su yu hòmber. Parti mainta e ta limpia na un ofisina i mas den lat e ta un dama di anochi. Ta bo destino dia  7 desèmber na La Tentashon. Karchi ta optenibel na takia di Teatro Luna Blou pa solamente Nafl 15,- pa dia. RBC Royal Bank ta invitábu! Pa mas informashon por yama 4622209. Bo por bishita nos página wèp. www.latentashon.com òf tira un bista riba facebook: la tentashon.