Kòrsou tin mas kampeon

Willemstad – Maduro & Curiel’s Bank ta orguyoso spònser di RBI League i djamars atardi riba patio di MCB na Rooi Catootje gerensia di MCB a selebrá ku e hóbennan di RBI Senior League ku a sali Kampeon RBI Regional i e selekshon di RBI Junior, sub kampeon di RBI Regional. E torneo di RBI Regional a tumá lugá na DodgerTown, Vero Beach Florida. Esaki ta di tres biaha ku Kòrsou ta kompetí den torneo regional di RBI i ta promé biaha ku ta logra un título di kampeon.

Gerensia di Maduro & Curiel’s Bank a invitá tur dos tim, coach, manager, delegado i representantenan di Curaçao Baseball Development Foundation pa un selebrashon chikí kaminda señor Michael de Sola miembro di gerensia di MCB a felisitá tur hoben pa nan prestashon i na nòmber di MCB a regalá kada pelotero di e tim un gift certificate ku nan por usa pa kumpra material di baseball. Komo muestra di apresio pa nan trabou boluntario i inkansabel pa e deporte di baseball señor de Sola a regalá kada miembro di Curaçao Baseball Development Foundation un pèchi personalisá ku nan nòmber. Na su turno señor Dennis Dambruck, presidente di Curaçao Baseball Development Foundation a yama MCB danki pa nan kontribushon i a entregá señor de Sola e shirt ku nan a risibí di RBI ora nan a bira kampeon.

Pa kompletá e atardi Sir Hensley ‘Bam Bam’ Meulens a sorpresá e hóbennan ku su presensia i a regalá kada un hóben un bunita brel di baseball Oackley i e tim di Senior League aparte di e brel a risibí un set di “batting gloves”. E tim di Senior League awor ta bai kompetí den e Serie Mundial di RBI na Minnesota di 5 pa 10 di ougùstùs próksimo. Esaki lo ta e di 26 edishon di Serie Mundial di RBI i e organisashon di Liga Grandi, Minnesota Twins lo ta anfitrion di e torneo final aki. Weganan mes lo tuma lugá na Universidat di Minnesota. Ta di elogiá i nos por ta sumamente orguyoso di esaki, ya ku Kòrsou ta e úniko país estranhero ku lo forma parti di e Serie aki. Tur otro tim partisipante ta di Merka mes.

Bo Banko Amigu ta deseá e tim di RBI Senior League hopi éksito na e Serie Mundial na Minnesota.