20 kursista hóben a risibí nan sertifikado

WILLEMSTAD- JÜLY 2018:  Tabata djasabra último ku partisipantenan di ‘Finansa Hubenil’ a risibí nan sertifikado.  E kurso tin komo meta pa konsientisá mucha riba e importansia di trabou i ta siña nan spar i warda ku pasenshi pa kumpra loke nan gusta. Ademas, e ta siña nan kon pa traha un presupuesto pa manehá nan finansa aun mas mihó. Den e trayekto di ‘Finansa Hubenil’ e mucha ta siña duna pa yuda otro mucha den nesesidat tambe; esaki komo un parti sosial di e programa.  Banco di Caribe ta mashá orguyoso di por aportá na un proyekto ku ta duna nos muchanan un bon base finansiero. Resientemente 20 mucha a risibí oportunidat pa partisipá grátis na e kurso.

Banco di Caribe ta kompartí e vishon di tutornan di e kurso; krea un futuro generashon ku ta manehá su finansa responsablemente, i ku ta biba segun un plan i un presupuesto. Esaki ta kuadra perfektamente ku e filosofia di Tesorito- e kuenta di spar pa mucha i hóben di Banco di Caribe. Sparmentu ta masha esensial den edukashon di un mucha. E maskota ‘Testorito’ tambe tabata presente djasabra último na ABVO pa  asistí na e entrega di sertifikado pa felisitá e 20 kursistanan.

Laga bo yu siña kon pa manehá su sèn:

Mayornan ku ta interesá pa duna nan yu un base sólido i siña nan for di edat yòn kon pa manehá nan finansas por inskribí pa e siguiente kurso di ‘Finansa Hubenil’ ku lo kuminsá dia 4 di ougùstùs próksimo.  Tur lès lo wòrdu duná riba djasabra na ABVO. Mayornan interesá por inskribí via finansahubenil@gmail.com òf yama 5157783 pa mas informashon.