Willemstad – Manera ta konosi “Move Tur Montaña” ta titulo di e prome kantika di Shamiro Anita, ku a bira top 1 den musika i ku ketu bai ta bendishonando hopi hende. Awor a yega e momentu ku Shamiro Anita ta bai lansa su prome buki titula “Move Every Mountain”.

Den bida tin dia trankil i tin dia duru ku ta pone bo na bo rudianan. Den su buki nobo Shamiro ta splika kon pa surpasa momentunan duru i difisil den bida ku fe i speransa den Dios. Ta trata di un buki skirbi na Ingles ku tin komo sub-titulo “Overcoming 15 of Life’s Toughest Challenges”. Ta premira ku e buki aki tambe lo bai yuda i bendishona hopi hende.

Estreno i Debut di e tremendo buki aki lo tuma lugá djasabra 11 di augustus 2018  den SAMBIL su Event Hall di 7or pa 9.30or di anochi. Shamiro i otro oradornan lo lesa i splika algun di e partinan mas impaktante di e buki. Tur esaki lo tuma luga den un ambiente dushi   bendishona ku kanto, baile i presentashon di otro artistanan invita. Henter pueblo ta invita i Entrada ta kompletamente gratis. Por spera un sala yen yen, pesei ta importante pa registra for di awor si bo ta bai e evenementu aki i pa yega trempan, paso e sala ta limita. Por registra i/of bestel e buki via whatsapp 5622233, email info@shamiromusic.com of www.facebook.com/shamiromusic

Shamiro su meta prinsipal ta pa sigui impakta mas i mas hende ku mensahenan positivo, prinsipalmente ku e palabra di Dios, pa medio di su kantikanan i awor pa medio di su buki tambe. E buki nobo aki ta konsisti di 16 kapitulo ku lo enkurasha tur ku lese pa solushona i surpasa problema i/of situashon difisil. Dia 11 augustus por kumpra e buki aki den Sambil i laga Shamiro firm’e. Despues por kumpr’e na boekhandelnan na Kòsòu of online via Amazon, Kindle, Barnes & Noble, Baker & Taler i Ingram. Pa mas informashon por bishita Shamiro su Facebook Page i website of tuma kontakto via tel/whatsapp.

Shamiro ta gradisi Dios na prome luga ku ta sigui Move Tur e Montañanan pa e por logra su metanan i ta manda un danki di kurason pa tur hende ta sosten’e.