Willemstad – Kòrsou – Maduro & Curiel’s Bank a anunsiá awe ku e ta bai hasi algún kambio den su ret di brènch durante e siguiente tres lunanan.

Entrante djabièrnè 28 di sèptèmber 2018, MCB lo deskontinuá servisio i sera e brènchnan na Otrobanda i Mangusá. Klientenan di e brènchnan aki por hasi uso di kualke un di e otro 11 brènchnan di MCB.

Mientras e proseso di reorganisashon ta tuma lugá, nos brènchnan na Otrobanda i Mangusa lo keda brinda servisio na nos klientenan te djahueps 27 di sèptèmber 2018.

Despues di e fecha aki, klientenan di MCB Otrobanda por opta pa sigui hasi nan asuntunan bankario den serkania na nos brènch na Colon, klientenan di MCB Mangusá por sigui hasi uso di nos brènch na Rooi Catootje òf na Brievengat i pronto na nos filial digital nobís nobís na Saliña. Naturalmente klientenan por hasi uso di kualke brènch ku nan ta deseá i ku ta kumbiní nan.

Maduro & Curiel’s Bank ta sumamente orguyoso di su historia largu di trata empleadonan envolví den kualke kambio organisatorio na un manera honesto, desente i ku rèspèt. E empleadonan ku ta laborá na e brènchnan en kuestion lo haña oportunidatnan nobo den Banko ku ta kuadra ku nan abilidatnan i eksperiensia.

E enfoke primordial di MCB Group ta p’e ta mihó organisá pa sirbi su klientenan dor di invertí den maneranan mas rápido, kumbiniente i inovativo pa hasi tur asuntu bankario. E konsolidashon di brènch ta unu netamente basá riba efisiensia i ta hasi posibel pa Banko optimalisá uso di su rekursonan pa mehorá produkto i servisionan di Banko aún mas den futuro.