Willemstad – Djadumingu 1 di desèmber último a tuma lugá e di 13 edishon di Xtreme Duo Mountain Bike. Esaki ta é kareda di mountain bike ku tur siklista semper ta en espera di dje pa klousura nan aña deportivamente. Un biaha mas Girobank, ta mira tras riba un evento eksitoso. Girobank ta sigi ku su kompromiso ku deporte pa ku nos komunidat i ta super orguyoso di ta e spònser prinsipal di e torneo aki. Xtreme Duo a konta ku un total di 182 partisipante di Kòrsou, Aruba, Boneiru i Sürnam. Algu nobo pa e aña aki, tabata introdukshon di un di dos ruta di 55km banda di esun konosí di 80km. E ruta “fun” di 55km ta speshalmente pa esnan ku kier eksperensia un kompetensia di e kaliber aki ku ta mas fásil i kòrtiku. Tur dos ruta a kuminsá i kaba na Blue Bay Curaçao. E reto un biaha mas tabata grandi pa kada partisipante. Tabata un plaser pa mira kon parehanan den e kompetensia ta sostené i guia otro pa yega e meta final huntu. Vista Bike, organisadó di e evento i Girobank komo patrosinadó prinsipal, ta ekstendé un palabra di gratitut na tur ku di un òf otro forma a duna nan aporte na e evento aki pa hasié grandi i alabes ta anunsiá ku preparashon nan lo kuminsá asina aña habri pa hasi e kareda di 2014 ainda mas grandi i eksitoso. Girobank lo sigui ta komprometé ku deporte den 2014. Pa resultado di e kareda di Xtreme Duo Mountain Bike bishita nos website na www.girobank.an òf www.vista-bike.com