Mariela Romero instalá komo Presidente

Willemstad – Den un seremonia chikí djadumingu dia 24 di yüni Curaçao Lions Club a instalá su direktiva nobo pa aña 2018/2019. E seremonia a konta ku presensia di miembresia, representantenan di Aruba Lions Club, Bonaire Lions Club, otro klupnan di servisio i algun invitado spesial.

Curaçao Lions Club ta eksistí 72 aña i e presidensia pa e aña leonistiko (1 jüli 2018 – 30 yüni 2019) a keda enkargá na Mariela Romero. Na yanüari 2015 Mariela a bira un León i den korto tempu ela move den diferente proyekto i aktividat di e klup. 3 aña despues e ta kla i miembresia a skohe Mariela pa dirigí e klup di servisio mas bieu di Kòrsou komo presidente. Mariela ta empleá na Maduro & Curiel’s Bank i ta dediká hopi di su tempu na trabou boluntario. E direktiva di 10 Leon ta bon balansá i tin diferente eks presidente di klup ku amplio konosementu i eksperensia.

Den su disertashon durante di e seremonia di instalashon, Mariela a bisa ku e pashon pa sirbi mester ta algu ku nos ta hasi di kurason i ku pashon. P’esei Mariela a skohe pa e lema “Passion into Action” (Pashon den akshon).

Mariela ta realisá ku Kòrsou ta kambiando, nos situashon sosial i ekonomiko ta kambiando i esaki tin un infuensia grandi riba nos sosiedat. Curaçao Lions Club lo sigui hasi fundraising, donashon i proyekto pero e ta apelá na miembresia pa ta habri pa kambio te asta pa kisas tradishonnan nobo. E ta ekspresá su disponibilidat pa traha ku otro klupnan di servisio den un proyekto i asina hasi un impakto mas grandi den nos komunidat.

Mariela a gradisí miembresia pero tambe su mayornan ku a sa di eduk’é for di chiki di e balor di kompartí i sirbi ku amor i kariño. E ta kontinuá bisando ku trahando na Maduro & Curiel’s Bank a yuda pa e sigui desaroyá su pashon pa hasi trabou boluntario i ta apresiá ku e por sigui konta ku sostén di sr. Chicu Capriles i gerensia di MCB. Mariela ta konsiente ku den un aña e no por logra tur kos pero ela primintí ku e lo hasi su máksimo esfuerso pa 2018 -2019 ta un aña eksitoso.

Miembronan di direktiva di Curaçao Lions Club 2018 – 2019 ta: Mariela Romero, Presidente; Claudia Hoogenbergen-Prodan, Immediate Past President; Ellen Goilo-Klok, Treasurer; Tamara Smith, Secretary; Leo Lemmens 1st Vice President; Victor Libiee 2nd Vice President; Alexis Daou, Membership Director; Don Hernandez, Director; Edsel Celestijn, Director i Lyrio Gomez komo Tamer.

Nos ta deseá direktiva nobo di Curaçao Lions Club hopi éksito!