Caracas, 25 di yüni di 2018 – Ayera, djadumingu 24 di yüni, ingeniero, komersiante i Presidente di Grupo Sambil Salomón Cohen Levy a fayesé na Caracas, Venezuela, kaminda awe nan lo hib’é na su último lugá di sosiegu.

Salomón Cohen Levy a desaroyá un karera ekstenso, determiná i pashoná. El a konstruí un grupo importante di inmobiliaria, ganando afekshon i konsiderashon den tur área di sosiedat Venezolano.

Salomón Cohen Levy a nase na Jerusalem dia 28 di mei 1927, den un famia Hudiu Sefardi, i a yega e suidat di Caracas ku su famia na edat di tres aña kaminda el a bin kompletá tur su estudionan. Despues di a gradua na 1951 komo Ingeniero Sivil na Universidat Central de Venezuela, el a kuminsá traha na Ministerio di Trabou Públiko.

Na 1958 el a funda Constructora Sambil i a kuminsá desaroyá edifisionan residensial, komersial i di ofisina. Na 1998 e la ekspandé e grupo di inmobiliaria i a kuminsá e konstrukshon i atministrashon di sentro di kompra i hotèl, inougurando Sambil Caracas komo e promé sentro di kompra ku a habri kaminda pa un kadena rònt e país i tambe krusando frontera na Repúblika Dominikana, Kòrsou i Madrid. Den Karibe, 28 di mei 2015 Sambil Curacao a habri su portanan pa públiko. Situá den e área di Veeris i asina formando parti di e bida kotidiano di e famianan lokal i tambe bishitantenan internashonal di nos isla.

Grupo Sambil ta basa riba valor i prinsipionan inspirá pa e bida di Salomón Cohen Levy, su kapasidat pa trabou i su determinashon. Resumi e fundadó di Sambil su filosofía ta: “konfiansa i rèspèt, tambe ta faktornan esensial pa konstrui éksito. Agregá tambe determinashon, boluntat i sa pa warda pa no deskurashá pa opstákulonan ku bo ta topa”. E karakter familiar di e grupo, kaminda ya e di tres generashon ta vinkulá ta otro di e aspektonan mas destaká di Sambil ya ku esaki Salomón Cohen Levy durante henter su bida a kuida hopi bon.