Mantenshon di boto i agensia di Suzuki

WILLEMSTAD – Pashon pa laman i pa boto ta na rais di lantamentu di Marine Zone na Zeelandia kaminda nan ta hasi tur sorto di trabou na boto. Tambe Marine Zone ta agente ofisial di e motornan di boto marka Suzuki pa Boneiru i Kòrsou. Na un forma masha informal den presensia di distribuidornan di Suzuki for di Puerto Rico nan a kaba di selebrá apertura di e empresa nobo na Kòrsou.

E empresarionan di Marine Zone, Louis ‘Luigi’ Posner (62) i Jens van der Lubbe (27), ámbos nasé i/òf lantá na Kòrsou, for di yòn tin un pashon pa laman i pues tambe pa boto. Ta parse ku tur dos tabata predestiná pa un funshon den e empresa familiar, pero esei a desaroyá otro. Bèrdat ta ku despues di a kaba su estudio di arkitektura tékniko na Hulanda, Louis Posner a regresá Kòrsou na e kompania Posner di komestibel, pero esei no a dura mashá. El a move pa Estados Unidos kaminda el a profundisá den trahamentu di motor pa boto i el a traha pa Outboard Marine Corporation (OMC) di Johnson/Evinrude, Bombardier, Suzuki i Mercury ku responsabilidat pa benta den Latino Amérika i Karibe. Den banda el a lanta su mes empresa marítimo na Florida. Na 2010 el a bini bèk pa huntu ku su señora lanta Bonaire Marine Center ku tayer na Kaya Industria na Boneiru, spesialisá den mantenshon i drechamentu profeshonal di boto i motor pa boto, benta di boto nobo i segundo mano, piesa i ekipo marítimo, depósito di boto, etc.

Agensia di Suzuki

Pa ekspandé e éksito aki pa Kòrsou el a haña un bon kompañero den Jens van der Lubbe na Kòrsou. Ku su estudio di seguro tabata parse ku e lo a sigui pasonan di su tata. Pero e konosementu ei i e estudio avansá den merkadeo i international business management lo yudé bon den su funshon nobo komo direktor di Marine Zone. For di mucha e tabata sinti’é kómodo den boto. Kasi dos aña pasá el a haña kontakto ku Louis Posner ku awor komo ko-direktor di Marine Zone ta tambe su mèntòr den e empresa nobo kaminda mantenshon na boto i motor den su nifikashon mas amplio ta esensial. Ademas nan komo agente ofisial ta instalá motornan di Suzuki; den tempu kòrtiku ya nan a bende 20 di e motornan moderno aki ku kliente ku a keta masha kontentu. “Banda di pashon pa e trabou, bo tin di invertí den bo klientenan. Esei nos ta hasi ku nos tim na Marine Zone’, segun Louis Posner a formulá e lema di e negoshi.