E biaha aki un gesto pa muchanan di Kolegio Mgr. Willem Ellis
WILLEMSTAD – YÜNI – Un djis ta temporada ku tur mayor ku tin yu na skol mester prepará pa kompra di artíkulonan pa aña eskolar 2018-2019. Desafortunadamente no ta tur mayor tin e mesun forsa finansiero i ku un ekonomia ku tin su desafionan, no ta tur mayor tin e mesun espasio finansiero tampoko. Renaissance Curaçao Resort & Carnaval Casino, despues di e éksito rotundo di desèmber último ku e ‘Toy Drive’, ke un biaha mas apelá riba nos komunidat pa duna un man den un otro proyekto pa komunidat.
E ‘Back To School Drive’ ta kuadra ku e filosofia di Renaissance Curaçao Resort & Casino, parti di Wind Creek Hospitality. Di akuerdo ku Heidi Foendoe, Gerente General di Carnaval Casino, ta masha importante pa un empresa lokal ta enbolbí den desaroyo di su komunidat, aki enfatisando ku Carnaval Casino ta muchu mas ku djis un casino. “Na desèmber último nos a mira ku nos miembronan, i bishitantenan ta komprondé nos filosofia di empresa. Esaki a kontagiá hopi hende ku ni sikiera ta bishita casino engeneral na Kòrsou- i esaki a toka nos kurason. Ta pesei e yamada aki, pa un biaha mas huntu nos bolbe hasi algu signifikativo pa nos komunidat.”
Un gesto pa muchanan di Kolegio Mgr. Willem Ellis
Muchanan lo tin mester di entre otro agènda pa skol, tas pa skol ku 2 kompartimentu, tèrmo, trònchi di pan, place mats, etuí pa pòtlot, pèn, pòtlot, gùm, sleiper, steft di koló, map pa skol, skref di 24 linia, skref pa aritmétika i map grandi di 23 renchi. E ‘Back To School Drive’ ta na benefisio di Kolegio Mgr. Willem Ellis. Por trese e artíkulonan di skol na Carnaval Casino Player’s Center entre dianan 3 di yüli i 5 di ougùstùs for di 10’or di mainta pa 9’or di anochi.
For di awòki masha danki!
Komo gratitut Renaissance Curaçao Resort i Carnaval Casino lo rifa dos anochi den Renaissance Curaçao Resort komo promé premio, entre tur ku a hasi un donashon di artíkulonan di skol. Di dos premio; un sena pa 2 persona, terser premio; un lùnch pa 2 persona, di kuater premio; un desayuno pa 2 persona i finalmente un di sinku premio; Carnaval Casino $50 free play cash. Risibí un formulario pa kada donashon, kompletá e informashon riba esaki i deposit’é den e tómbola na Carnaval Casino. Lo saka e ganadónan dia 5 di ougùstùs. *E ganadónan no mester ta presente durante di e sorteo. For di awòki Renaissance Curaçao Resort & Carnaval Casino i Wind Creek Hospitality ta gradisí tur hende pa nan aporte na e ‘Back To School Drive’.