WILLEMSTAD – Kòrsou a logra un reputashon importante ku organisashon di un variedat di festival. E festivalnan aki anualmente ta atraé miles di bishitante ku huntu ku nos hendenan lokal ta bin disfrutá, manera di nos Curacao North Sea Jazz Festival, nos Curaçao International BlueSeas Festival i nos Curaçao International Film Festival Rotterdam.

Pero loke tabata falta den e rei di selebrashonnan públiko aki ku Fundashon Bon Intenshon ta organisá, ta un festival dediká na Kórsou su folklor, Kòrsou su herensia kultural. Un festival kaminda Kòrsou su artistanan lokal, su poetanan, su músikonan ta bini huntu pa selebrá i kompartí kuentanan ya lubidá i pa rebibá nos kansionnan, nos obranan teatral i nos ekspreshonnan kultural. Un festival kaminda ta prepará i bende nos kumindanan krioyo i boka dushi di nos grandinan.

E festival aki ta trese tur e elementonan menshoná ei huntu ku e propósito pa krea un ambiente i sentido positivo bou di nos hendenan di Kòrsou. I komo chèri riba e bolo, e festival aki tambe ta koinsidí ku dia 2 di yüli, Dia di Himno i Bandera. Pa e dia ei lo prepará un programa kompleto.

Ban huntu i sam-sam ku nos bishitantenan internashonal duna e dia aki realmente e toke krioyo ku e meresé.