WILLEMSTAD/ Fanátikonan di tantu Dreams i Qshans awe ta kontentu! Despues ku algun tempu pasá Quincy ‘Biggie’ Comenencia a skibi un piesa pa Qshans interpretá ku Dreams, awe fanátikonan por skucha e produkto final. Un joya di un kansion, ku ta papia di un amor pèrdí pero ku pa semper lo keda den kurason. E propósito di un konekshon i un relashon amoroso. E manera kon un ‘ayó’ no tur ora mester ta pa semper si únikamente nos logra komprondé e motibu kósmiko ku dos persona ta topa otro den bida. Kennard Maduro ta kompletá e totalidat ku un tremendo areglo. Meskla final a tuma lugá na Hitz. Esaki no ta promé biaha ku Qshans, Biggie i Kennard ta traha huntu, pues tin un sinergia masha spesial entre e tres amigunan.

Ya kaba den pasado Qshans, a yega di kolaborá ku Dreams pa temporada di karnaval i a sòru pa un bon presentashon den Festival di Tumba 2017. Esaki mes tabata base pa un otro kolaborashon. Siman pasá, Qshans a graba un video den kual e mes a komentá di e satisfakshon ku e ta sinti despues di a kaba di graba e piesa “Ounke b’a bai…”. Den e mesun video e artista yu di Kòrsou den Lion King Hulanda ta konta tambe di e kolaborashon ku Dreams i a dirigí un palabra na su koleganan músiko bisando ku Dreams ta un tim dinámiko, fásil i disipliná pa traha kuné. Riba esaki Axel Pikero, direktor musikal di Dreams ta komentá ku e tin hopi espektativa pa e piesa i na su turno ta felisitá tur tres kabayero pa e kolaborashon musikal. Mas aleu e ta komentá ku Dreams ta ketu bai den studio di grabashon ya ku tin mas piesa nobo na kaminda.

Por sigui Dreams riba nan página di Facebook i nan Instagram. Meskos tambe Qshans, riba qshanslive. Ademas, por stream riba ITunes, Spotify, Tidal i Apple Music.  Tin un lyric video riba Dreams su Youtube Channel pa tur fanátiko por tuma nota i disfrutá di letranan di e piesa di mas nobo pa Dreams “Ounke b’a bai…”. Solisit’é na bo radio preferí i disfrutá!