Ministerio GMN i minister Sra. Suzanne Camelia Römer (Ministerio Salubridat, Medio Ambiente & Naturalesa) huntu ku ADECK ta invitá hóbenan, empresarionan, produktornan i pueblo di Kòrsou en general pa asistí na un anochi informativo KOMPLETAMENTE GRATIS djamars próksimo. Esaki den kuadro di e proyekto: “Kunukito Hidroponiko” ku GMN tin huntu ku ADECK.

GMN i ADECK ta orguyoso ku e proyekto akí ku nan ta manehá konhuntamente sigur lo duna bon fruto pa komunidat di Kòrsou. Dia 19 di yüni próksimo lo tin un anochi di informashon den kuadro di e projekto Kunukito Hidroponiko, kaminda minister Sra. Suzanne “Suzy” Römer lo hiba palabra riba diferente aspekto i vishon di e proyekto. E proyekto akí ta unu pa stimulá produkshon lokal i guía tantu hóben, empresarionan, produktornan i pueblo en general riba sistemanan inovativo pa ku e sektor di agrikultura.

Tantu GMN komo Adeck ta konvensí ku mester pone énfasis riba e parti di agrikultura i salubridat aki na Kòrsou. Pa e motibu akí GMN i Adeck ke krea e Kunukitonan akí pa asina aportá no solamente na e sektor pero tambe den guía i formashon di nos pueblo i tambe den e proseso di hasi negoshi den e sektor akí. Esakí lo ta na benefisio di e pueblo mes i di ekonomia di Kòrsou.