Komo parti di resultado di reunion entre Minister, Curinde i komersiantenan

Willemstad Mei 2018 –  Esfuersonan pa stimulá mas aktividat i mas kumpradó den nos zona ekonómiko ta keda intensivá.  Nos zona ekonómiko tambe ta pasando den un momentu di reto.  Esaki tabata rason pa Minister enkargá ku Desaroyo Ekonómiko dr. Steven Martina i Curinde reuní ku e empresarionan ku ta hasi negoshi for di nos zona ekonómiko.  Durante di e reunion a atendé e puntonan di prekupashon di e komersiantenan i a kumbiní ku huntu ta intensivá esfuersonan pa stimulá mas aktividat ekonómiko den nos zonanan ekonómiko.

Curinde a bin ta hiba un maneho agresivo pa krea tantu un infrastruktura i klima adekuá pa hasi negoshi den nos zonanan ekonómiko pero tambe ta hasieno esfuerso pa propagá i fasilitá aktividat komersial den nos zonanan ekonómiko.  Asina Curinde den un forma agresivo ta merkadeando nos zona ekonómiko na radio i televishon i den korantnan den merkadonan manera Santo Domingo, Haiti, Surnam i Trinidad & Tobago.  Curinde pa medio di su website www.boutiqueofthecaribbean.com i merkadeo online ta ofresé na mundu tur loke bo por haña den nos zonanan ekonómiko.

Curinde di un forma aktivo ta trahandó pa trese kumpradónan for di merkadonan manera entre otro Trinidad & Tobago, Jamaica i Cuba.  Huntu ku demas entidatnan ta trahando duru pa reestablesé konekshon aereo pa merkadonan importante pa benta den nos zonanan ekonómiko.  Meskos por menshoná e koperashon estrecho ku Direktorado di Asuntonan Eksterior pa fasilitá dunamentu di visa na kumpradónan for di p.e. Cuba, Haiti i Republika Dominikana ku ta rekerí visa pa drenta Kòrsou.

Den e mesun lus mester mira Curinde su  aserkamentu, ku insistensha, na gobièrnu ku varios  inisiativa pa asina por oumentá mas trafiko i aktividat den nos zona ekonómiko dor di p.e. oumentá e montante ku turistanan por kumpra, liber di impuesto, den nos zona ekonómiko.  Esaki lo ta sigur algu interesante pa turistanan krusero na kua próksimamente lo kuminsá ofresé e posibilidat pa hasi tour di kompra den nos zona ekonómiko.  Finalmente, bal menshoná ku Curinde a hasi petishon na gobièrnu pa, meskos ku na Panama, permití un “blow-out sale” riba kuater Djasabra den un aña ya asina esnan lokal interesá tambe por drenta zona i hasi nan kompra por mayor.