ORANJESTAD, Aruba – 4 di juni 2018: A apunta Lincoln D. “Dello” como Presidente di e Directiva di Digicel Aruba. E no ta un hende straño den Digicel, pasobra Gomez tabata instrumental den establecimento di e operacionnan di Digicel na Aruba, trahando hunto cu e fundado y Presidente di Digicel Group, esta Denis O’Brien. El a keda cu e grupo pa 7 aña largo den su capacidad di Managing Director y como miembro di e Hunta di Supervision.

Dello Gomez ta un partner y abogado na e bufete ‘Gomez Coffie’ y e ta practicando abogacia desde aña 1998. Su practica principal ta enfoca riba leynan corporativo di Aruba, leynan di energia, di telecomunicacion, propiedadnan intelectual y den atende casonan civil. Prome cu esey el a traha como abogado specialisa den financiamento di proyectonan, den area di hospitalidad y area di aviacion. Gomez a fungi entre 1995 pa 1997 como Consehero di Minister di Husticia y Obranan Publico di Aruba.

Dello Gomez ta conoci pa su talento pa logra un solucion creativo den retonan legal complica. “E nombracion como Presidente di e Directiva di Digicel Aruba ta un berdadero honor. Mi tabatin e privilegio di mira e compania crece, tanto di cerca como di leu, desde su prome dia te cu awe y mi mester bisa di ta masha orguyoso di e direccion cu e ta bayendo aden. Trahando cu talentonan local y cu conocemento di e mercado ta masha importante pa un compania global asina y mi ta convenci cu lo mi por contribui den forma positivo den e desaroyonan continuo di e compania, manteniendo clientenan y nos comunidad na prome luga den tur locual nos haci”, asina Dello Gomez a duna di conoce.

Alexander Matuschka, kende ta e CEO di Digicel Group, a comenta cu “Lincoln a traha hopi aña pa Digicel y p’esey nos ta kere cu ningun otro hende conoce e operacion na Aruba mes bon cune. E ta conoci pa ta posee un standard halto den excelencia cu e ta aplica unda cu e bay y nos ta sperando riba esey tambe awor cu su regreso den Digicel. Nos ta contento di tin’e entre nos den Directiva den e capacidad nobo aki y nos ta yam’e bon bini na cas”.

Dello Gomez a cuminsa su carera academico studiando biokimica na Saint Leo University na Florida. Despues a studia ley na Universidad di Aruba y tambe a studia “International Tax & Financial Services” na San Diego, USA. E tabata Presidente di Orden di Abogado di Aruba y tabata un di e miembronan cu a funda e “Dutch Chamber of Commerce” na Miami. Actualmente e ta Presidente di e Directiva di Fundacion Museo Arubano (FMA), cu ta responsabel pa opera 4 museo na Aruba.

Digicel Group ta un proveedor completo di comunicacion y entretenimento, cu operacionnan den 31 mercado rond di henter Caribe, Centro America y Asia Pacifico. Digicel ta conoci pa su iniciativanan comunitario den tur su mercadonan, enfocando riba educacion, cultura y programanan di desaroyo social. Pa mas informacion por subi www.digicelgroup.com