Ekonomia a kremp ½% na 2017

WILLEMSTAD – Di 2017 por papia di un ekonomia di Kòrsou ku a kremp ½ porshento. Di e forma ei 2017 ta kuadra den un desaroyo di término largu di un ekonomia ku ta kremp pokopoko.

Despues di e promé mitar di 2017, ekonomia a duna e promé señalnan di revitalisashon, pero esaki por lo pronto ta señalnan suak di un rekuperashon leve. Spesialmente den turismo i logístika por opservá rekuperashon. Pero e rekuperashon ainda no ta respaldá pa desaroyonan positivo den konstrukshon i gastunan konsumptivo di famianan. For di 2008 no tabatin niun aña mas ku un kresementu ekonómiko di importansia. E tendensia for di 2008 ta ku e produkshon ekonómiko ta baha pokopoko. Pa loke ta e periodo 2009-20017 ekonomia a kremp ku 2,5% (kalkulá pa KdK). Lamentablemente e desaroyonan na 2017 ta kuadra den e imágen aki. Tokante henter 2017 e kousanan prinsipal pa e kresementu ekonómiko desapuntante por atribuí na e desaroyonan den konstrukshon, logístika, rafinahe i invershonnan (gubernamental). Di otro banda, turismo ta subiendo. E promedio di okupashon di e hotèlnan a subi na 2017 i e oumento di e ‘average daily rate’ ta keda serka di e promedio riba término largu di alrededor di 2% riba inflashon pa aña. E kantidat di trasnoche (‘stay-over-nights’) ta kresiendo atrobe, pero esaki ta keda te ainda bou di e promedio di término largu. Despues di un bahada for di 2014, na 2017 e kantidat di pasahero krusero a oumentá fuertemente. E sektor logístiko, spesífikamente aeropuerto, a mustra un kaida fuerte kompará ku 2016, pero den e di dos mitar di 2017 tabatin un rekuperashon.

Den e di dos mitar di 2017 ta parse ku e desaroyonan den konstrukshon ta determiná pa un baha di e hipoteknan di negoshi i un bahada di e nivel di invershonnan gubernamental. E bahada di e hipoteknan komersial ya ta data for di kuminsamentu di 2016. E hipoteknan familiar tambe a demostrá un bahada leve durante e promé mitar, pero den e di dos mitar el a mustra un subida. Despues di un subida grandi na fin di 2016, e invershonnan gubernamental a baha drástikamente na 2017. Informashon tokante e desaroyonan den konstrukshon pa loke ta e promé lunanan na 2018 ta parse di ta indiká ku den e promé kuartal di 2018 no por spera un rekuperashon den er sektor konstrukshon ainda.

Den e nivel di gastunan konsumptivo di famianan a surgi un bahada leve na 2017, kompará ku 2016. Préstamonan konsumptivo si a sigui, pero den e di dos mitar por mira un baha leve pa loke ta benta di outo i kompra di merkansia di luho. Tin un mehoransa leve den e kategoria di invershonnan komersial aktivo koriente, pero di otro banda tin e bahadanan menshoná anteriormente di invershonnan komersial den aktiva fiho i di e invershonnan gubernamental. E nivel di aktividatnan di rafinahe ta bolbe baha na 2017.