WILLEMSTAD- 28 di novèmber 2013 – Den kuadro di e kampaña di konsientisashon ‘Dushi Hende’ ku ta pone énfasis riba 6 balor klave kualnan ta: servisio, hospitalidat, responsabilidat, orguyo, integridat i honestidat resientemente Ofisina di Turismo di Kòrsou (CTB) a organisá un workshop pa studiantenan. Esaki tabata e di 5 edishon di e Student Workshop kual a hiba komo tema Integridat. Meta di e Student Workshop tur aña di nobo ta pa duna e studiante e hèrmèntnan nesesario pa por subi merkado laboral di turismo bon prepará. E aña aki USONA a finansiá e workshop ku fondonan di desaroyo di Hulanda. E workshop tabata dirigí riba studiantenan di SBO di e sektor di turismo i horeca. Un total di 71 studiante a partisipá na e workshop. A konta ku partisipashon di Nilda Pinto SBO, Maris Stella SBO, CDC /UDC i FEFFIK. E studiantenan mester a hasi diferente tarea práktiko; e studiantenan a keda repartí den grupo di 25 i hasiendo uso di e método di ‘experiential learning’ nan a haña konosementu i abilidat di e tema. Di forma interaktivo, kada trainer a trata un tópiko ku ta forma parti di e tema Integridat. Durante di e workshop e studiantenan a siña kiko ta nifiká integridat i dikon ta importante pa nos ta hendenan íntegro. E studiantenan a siña ku tá íntegro ta nifiká ora bo aktua semper segun regla, norma i balor di bo komunidat pues aktua korekto tur ora asta den situashon ku otronan no ta mira bo. Tira kos for di outo ora niun hende no ta mira bo òf kue un florin ku bo a mira kai for di un otro hende no ta íntegro. Den grupo e studiantenan a debatí riba diferente ponensia ku tin di haber ku e tema di integridat. E studiantenan tabata obligá pa skohe si nan ta di akuerdo òf no di akuerdo ku e ponensia i splika e motibu di nan eskoho. Tambe nan mester a ehekutá diferente tarea kaminda nan mester a traha den team i siña konfia den otro. Na final e studiantenan a risibí un sertifikado di partisipashon na e Student Workshop dirigí riba e tema Integridat. CTB ta kontinuá ku su esfuersonan pa sigui plama e mensahe di e kampaña di ‘Dushi Hende’ tambe bou di studiantenan di turismo i horeca ku ta nos futuro trahadónan den sektor di turismo. Pa tur esnan ku ta aktivo riba Facebook kòrda ‘like’ e página di Facebook di ‘Dushi Hende’, www.facebook.com/DushiHende Ban sigui plama e mensahe ku Ta Dushi pa ta Dushi Hende.