WILLEMSTAD – Resientemente sr. Charlwin (Broertje) Marshall, kompañá pa sr. Kenrick Amalia (nos chefnan kulinario) i sr. Pablo Infantes Peres, un chef kulinario di Ecuador i alabes vice-presidente di Asociación de Chefs Regional Norte Ecuador a hasi un bishita di kortesia serka Minister di Enseñansa, Siensia, Kultura i Deporte (ESKD), sra. Marilyn Alcalá-Wallé.

Sr. Marshall a konosé sr. Infantes Peres algun aña pasá tempu ku sr. Marshall a duna un ekspo kulinario na Ecuador.

Komo akto di gradisimentu na Kòrsou sr. Infantes Peres a hasi entregá di un sertifikado na nòmber di La Asamblea General de la Asociacion de Chefs Regional Norte del Ecuador, na Minister di ESKD, kaminda Minister di ESKD ta keda nombrá komo miembro Honorario di Asociación de Chefs Regional Norte Ecuador:  “Por el valioso aporte a la promoción y difusión de la gastronomía del Norte del Ecuador en el país de Curazao”.

Huntu ku esaki sr. Pablo Infantes a hasi entrega di un eskultura, asina yamá “Pachamama” ku ta un Diosa di fertilidat den mitologia di Inka ku ta reina riba plantashon i kosecha.

Tambe sr. Pablo Infantes ta gradisí pueblo di Kòrsou pa e forma kaluroso ku ela keda risibí na Kòrsou.

Na su turno, Minister di ESKD tambe a duna sr. Marshall un sopresa grandi na momento ku ela anunsiá ku Gobièrnu di Kòrsou a deliberá riba un premio kulinario pa ana 2019 ku ta ser yamá na honor di Broertje Marshall. Esaki tbt un momento bastante emoshonante pa tantu Broertje komo su mama stimá. Un pabien ta bai pa Broertje i famia.