WILLEMSTAD – Awe 18 di mei, riba Dia Internashonal di Museo, Gobièrnu di Kòrsou ta konmemorá i pone atenshon na nos museonan i nan ròl importante den nos komunidat.

Museonan ta forma parti inherente di nos sosiedat, nos paisahe kultural i herensia natural. UNESCO a rekonosé museonan komo partnernan prominente pa krea pas den mente di hende i tambe espasio pa diálogo i mediashon kultural.

Kultura ta forma e base di desaroyo di nos komunidat i ta un instrumento pa konstrukshon di nos nashon. Pa e motibu aki Gobièrnu di Kòrsou ta sostené institutonan ku ta pone atenshon na nos historia, herensia i ekspreshon kultural.

Huntu nos ta krea konsientisashon históriko ku ta kontribuí na desaroyo di balor propio. Tur esaki ta aportá na fortifikashon di nos identidat komo individuo i sosiedat.

Den siglo 21 ta nesesario pa museonan redefiní nan mishon, meta, funshon, strategianan i rekursonan pa asina por bira mas sensibel na e dinamismo di nos sosiedat moderno i kambionan urbano. Museonan mester fungi komo agentenan di kambio; nan mester reflehá eventonan den sosiedat i bira instrumento di progreso kaminda ta duna atenshon na akshonnan i eventonan ku ta enkurashá desaroyo den sosiedat. Nan mester ta institutonan ku ta fomentá pas, promové e idealnan di demokrasia i transparensha den gobièrnu i den komunidat.

Pa medio di uso teknologia nobo, museonan ta hunga un ròl esensial na akseso demokrasial riba tereno kultural. Pa e motibu aki Konseho di Museonan Internashonal a skohe e tema di e aña aki kual ta: Museonan hyperkonektá: aserkamentu nobo, públiko nobo”.

Hyperkonektividat ta un término ku a keda inventá pa deskribí e komunikashon ku nos tin awendia por ehèmpel kontakto kara a kara, e-mail, telefòn i internet. E ret global aki di konekshonnan tur dia ta bira mas kompleho, diverso i integrá. Museonan tambe awor ta forma parti di e tendensia “hyperkonektá”. Di e forma aki ta enbolbí i konektá ku un públiko nobo i tambe di embargadura mas ekstenso.