Marnix FO kampeon di lesa na papiamentu i hulandes.

Willemstad – Fundashon Sentro pa Inovashon i Guia Edukashonal (SIGE), a selebrá e aña aki e di 20 aniversario di kompetensia Lesa pa otro skucha entre nos skolnan di fundeshi i spesial aki na Kòrsou, huntu ku nos spònser prinsipal Bo Banko Amigu, Maduro & Curiel’s Bank. Den e kompetensia aki kampionnan di e diferente skolnan di fundeshi i spesial a kompetí ku otro den ‘lesa pa otro skucha’, lesando na papiamentu i hulandes.

Ku e aktividat aki SIGE huntu ku LITO i MCB a bin ta promové lesamentu di buki bou di nos muchanan, netamente komo un medio pa komuniká i komprondé teksto, konosé su kultura, su alrededor i nos mundu. ‘Lesa pa otro skucha’ komo un forma diferente di lesamentu ta plaser pa grandi i chikitu i ademas ta stimulá desaroyo di idioma, konsentrashon, kreatividat i abilidat sosial serka e mucha.

Djasabra último, dia 21 di aprel e 10 finalistanan di e diferente skolnan kual ta M.M. Römerschool, St. Franciscus College, Kolegio Chaya Willems, St. Margaretha College, Sta. Rosa de Lima College, Helfrich-Krijtschool, St. Antonius College i Marnix FO a kompetí ku otro den PWFC Multifunctional Center den e kompetensia final, kaminda tabatin un ambiente tremendo i tur presente a gosa un bòl. Maduro & Curiel’s Bank a pone premio disponibel pa e skol di finalistanan di tantu kategoria papiamentu komo hulandes. E kampionnan a risibí kada un NAf. 2.000,–, pa nan skol, e di dos premio NAf. 1.250,– i e di tres premio NAf. 750,– pa nan skol. E skol ku a animá (“Yell”) su partisipante mas mihó a risibí NAf. 500,–. Tur e 10 finalistanan amiguitu di LITO ku a representá nan skol den final a risibí nan premio individual serka LITO i den rondanan preliminar tur mucha a risibí bunita regalo. E resultado di e final di e kompetensia ta lo siguiente:

E premio pa e mihó “Yell” a bai pa Helfrich-Krijtschool

Ganadornan di “Lesa pa Otro Skucha 2018” na hulandes:

Ganadó apsoluto a resultá Julian Voogt di Marnix FO

E promé finalista ta Mary-Lee Felipa di St. Franciscus College

E di dos finalista ta Alison Margarita di St. Margaretha College

Ganadornan di “Lesa pa Otro Skucha 2018” na papiamentu:

Ganadó apsoluto a resultá Faragny Wooter di Marnix FO

E promé finalista ta Rihanna Cassares di Helfrich-Krijtschool

E di dos finalista ta Dailiex Mingeel di Sta. Rosa de Lima

Sentro pa Inovashon i Guia Edukashonal ta yama danki na e spònser prinsipal MCB i LITO, pero tambe na otro kompanianan ku a koperá ku diferente regalo pa e 10 finalistanan: House of Style, Dolphin Academy, Boekhandel Boekplus, Boekhandel Mensings Caminada, Korpodeko, Otro Kara Tambe, CPA, Kompania Tòu Kòrsou, Banko Sentral di Kòrsou i Sint Maarten, Biblionef, ACU, CORE, Kooyman, Curinde i Advocatenkantoor van Eps Kunneman van Doorne.