WILLEMSTAD:- Djasabra último a tuma lugá e terser edishon di TEDxCuraçao 2018 ku e tema ‘Smashing Boxes’. E anochi na Villa Maria, den Skalo a brota ku inspirashon i ideanan inovativo na momentu ku a presentá 11 orador internashonal i lokal. Un públiko di aproksimadamente 400 persona a hasi ku TEDxCuraçao 2018 tabata un evento mashá éksito.

Spesialmente pa e anochi aki a kombèrtí Villa Maria den un sala di konferensia airu liber, esaki a inkluí un pantaya grandi high-tech, e stulnan a keda akomodá estilo di un amphiteater i e anochi mes a keda aksentuá ku iluminashon perfekto ku tabata varia dependiendo e orador di turno. Realmente un eksperensia estilo TEDx! Oradornan, Priscilla Lotman, Roël Calister, Veronique Toulon, Steven Coutinho, David Allen (keynote), Jasmine Sendar, Mark Tigchelaar, Joeri Oltheten i Joel Simonetti a pèrkurá pa un anochi realmente eksitoso. Apertura di e evento a keda den man di sr. Prome Minister, Eugene Rhuggenaath ku tambe a kompartí algun eksperensia personal den un spich masha inspirativo. Durante pousa e kantante Steve Mariat a pèrkurá pa un dushi ambiente miéntras tur hende por a kòmbersá i estrechá lasonan di kontakto.

Nephtalie Demei, ku tin e lisensia pa TEDxCuraçao ta splika ku un TED Talk no por dura mas largu ku 18 minüt. Tur orador a tene nan mes na un spich di entre 3 pa 18 minüt loke a hasi e evento masha plasentero. E spichnan tabata variá ku tópikonan informativo, motivante, ku informashonnan práktiko, interkambiá ku eksperensianan personal. Na final di e anochi a klousura e evento ku un afterparty ku a bira posibel danki na kontribushon balioso di vários patrosinadó, entre nan Guardian Group, SOAB i esun mayó, Aqualectra.