WILLEMSTAD- 27 di  novèmber 2013: Durante di un Konferensha di Prensa organisá pa Ofisina di Turismo di Kòrsou (CTB), direktor interino di CTB sr. Hugo Clarinda, sr. Edward Suares di CTB Europa i sr. Miles Mercera, Marketing & Product Manager di CHATA a duna informashon riba e merkado Aleman. A pone atenshon prinsipalmente riba e grupo di travel agents Meier’s Weltreisen for di Alemania ku ta aktualmente di bishita na Kòrsou. E kresementu den e merkado Aleman ta kanando di forma positivo. Sifranan kolekta pa CTB ta mustra un kresementu bou di e paisnan ku ta papia e idioma Aleman. Ta trata aki di Oustria, Alemania, Luxemburg i Suisa. Si na 2011 nos tabata papia di un total di 10,058 bishitante for di e paisnan ariba menshoná, aworakí e kantidat registrá te ku luna di novèmber 2013 ta 18,812. E aerolíneanan KLM i Airberlin ta esnan ku ta sòru pa trese e bishitantenan aki Kòrsou. E aerolínia Airberlin a kuminsá bula Kòrsou for di novèmber 2011 pues e luna aki nan ta kumpliendo nan di 2 aniversario ku buelo pa Kòrsou. Airberlin ta e úniko kompania di aviashon Aleman ku ta brinda su pasaheronan un bes pa siman riba djamars, un buelo pa Kòrsou. Mas aleu a para ketu na e importansia di bishita di un grupo manera esun di Meier’s Weltreisen na Kòrsou. Ta trata aki di un total di 105 travel agents prosedente for di Alemania. Meta prinsipal di e biahe aki ta pa e grupo siña mas di e produkto ku Kòrsou ta ofresé pa asina nan por bende e destinashon Kòrsou di un manera optimal. Durante di nan bishita na Kòrsou e grupo lo bishita diferente atrakshon turístiko manera entre otro: Aloe Farm, Dinah Veeris, Chobolobo, The Natural boat i Dolphin Academy. Tambe e grupo lo partisipá na un tour pa konosé nos sentro di siudat i e parti west di Kòrsou. Durante di nan estadia lo sòru pa e grupo konosé e variedat di platonan ku ta keda ofresé na Kòrsou, for di kuminda krioyo na Plaza Bieu te na restorantnan ku ta ofresé platonan internashonal. E kulminashon di nan estadia ta na momentu ku e grupo lo partisipá na un parada di Karnaval kombiná ku Seu. Esaki despues di haña lès di baile pa asina siña kon pa baila tumba i seú. E parada ta tuma lugá djadumingu 1 di desèmber saliendo for di Avila Beach Hotel pa 6or di atardi direkshon pa Sunscape. Pueblo di Kòrsou ta invitá pa bin apoyá  nos bishitantenan for di Alemania ku lo ta den e parada, pa asina nan sinti e kalor ku nos sa di demostrá ora nos ta disfrutá di nos fiestanan kultural.