Willemstad – Pa promé biaha ta tuma lugá e gran final di Festival di Sine Karibense di Derecho di Mucha di UNICEF. Esaki ta 14 di aprel den teater di The Cinema’s na Willemstad, durante Curaçao International Film Festival Rotterdam. Mucha di skol básiko den Karibe huntu ku un coach di sine a traha e último lunanan na produkshon di un sine tokante derecho di mucha. Durante e festival akí ta pasa e seis mihó sinenan pa públiko grandi i hurado ta skohe un ganadó.

E sinenan ku e muchanan a traha, ta bai tokante e derecho di mucha ku nan mes ta haña importante. E produkshonnan ta trata e temanan di mas diverso; di trabou di mucha te na tentamentu Ku e sinenan, e muchanan tin oportunidat pa mustra esnan ku ta tuma desishon manera promé minister Eugene Rhugenaath i Gobernador Lucile George- Wout – presente na e festival – i otro profeshonal kua derecho di mucha nan ta haña importante i kon esei ta bin dilanti den nan bida.

‘Ku e Festival di Sine di Derecho di Mucha, na un manera aktivo i kreativo UNICEF ke hasi mucha konsiente di nan derecho’, Melody Liefhebber di UNICEF ta bisa. ‘Ku mayor i dosente tambe ta haña mas konosementu tokante derecho di mucha, ta yuda, asina mucha huntu ku adulto por sali na interes di nan derechonan.’

E ganadónan di e festivalnan di sine di Saba, Sint Eustatius, Sint Maarten, Boneiru i Aruba ta biaha huntu ku nan coachnan di sine pa Kòrsou pa risibí nan komo strea di sine real.

Nan ta bini di seis skol: Colegio Santa Filomena (Aruba), Strea Briante (Boneiru), Fatima College (Kòrsou), akohida despues di skol Mega D Youth Foundation (St. Eustatius), akohida despues di skol Child Focus (Saba). E skol ganadó na Sint Maarten ta wordu annunsia e seman aki.

Final di e gran festival di sine karibense pa mucha ta parti di Curaçao International Film Festival Rotterdam. E finale di Festival di Sine di Derecho di Mucha di UNICEF ta bira posibel ku yudansa tambe di Ministerio di Interior i Relashon ku Reino i Curaçao International Film Festival Rotterdam.