Tropical Bottling a train y certifica 63 waiter y bartender na Aruba

ORANJESTAD, Aruba – 6 di April 2018: Tropical Bottling Company hunto cu embahador di Bacardi Carlos Maestracci a organisa un Master Bartending Training pa bartendernan na Aruba. E dos dia di training aki a tuma luga na Azia Restaurant and Lounge.

Durante e training aki nan a papia riba tur marca cu Bacardi ta carga, nan historia y proceso di produccion. E invitadonan a keda sumamente contento di por a participa na un training di caliber asina halto duna door di e embahador mes di Bacardi cu tin hopi aña di experiencia den e ramo aki.

Durante di e training Carlos Maestracci a haci diferente sesion di cocktail, dunando un enfoke special riba e cocktailnan clasico cu nunca lo bay for di moda y cu ta wordo pidi tur dia door di nos local y en special nos turistanan.

Tur waiter y bartender sigur a sali contento y hopi bon informa riba e productonan di Bacardi y con nan por uza esaki den nan trabou diario, pidiendo sigur un ripiticion pa mas training den futuro.

Carlos Maestracci a sinti cu nan a logra e meta cu tabata tin. El a expresa cu den trahamento di cocktail tin un cambio grandi, di cual den e pre mix cocktail ta haci uzo di mescla prepara. Pero awendia bartendernan ta mas entusiasma, mas detayista y ta studia nan mes con pa haci y mix cocktailnan mas trendy. Nan sigur a siña tecnicanan nobo y por mira cu hende nan a aprecia esaki.

Ken ta Carlos Maestracci?

10 aña pasa, Carlos Maestracci su carera a cuminsa den industria, trahando den restaurant manera un assistent di bar y manehando servicio di personal. Despues di algun luna, el a dicidi cu loke y unda e ta gusta mas ta e trabou den bar, y automaticamente a cuminsa no solamente traha den bar pero siña tambe di e bar y completando riba su mes curso nan online. Den e proceso ey intercambiando opinion cu diferente hende den e industria, cu a wak su talento for di e prome dia.

Durante e transcurso aki, Carlos su fascinacion pa e mundo di likeur a nace, cu un pasion pa su trabou y constantemente siñando mas. El a haya e oportunidad pa traha man den man cu chefnan internacionalmente conoci den eventonan di mixed cocktails, participando den varios competencia, na diferente pais, unda cu sin duda cambia su manera di sirbi hende.

Cu tempo su carera a sigui crece, trahando cu diferente marca mundialmente reconoci den industria, unda cu na 2014 a cuminsa traha cu e famia di Bacardi como embahador regional di e portofolio. Cual e obhetivo principal ta traha receta y bebida nan cocktails, haci tasting sin laga for educa consumidor y empleadonan over e marcanan cu Bacardi ta carga cual ta inclui: e famoso rum Bacardi, e prestigioso Vodka Grey Goose, Bombay Sapphire, Martini y sin laga afo Dewar’s whisky