Un danki na patrosinadó Guardian Group Fatum

WILLEMSTAD:- Resientemente a tuma lugá e promé Speakers Pitch di TEDxCuraçao, na Bar 27 den Pietermaai. Esaki mesora a marka e kick-off pa e evento grandi di TEDxCuraçao ku lo tuma lugá dia 14 di aprel próksimo na Villa Maria den Skalo. TEDx ta mundialmente konosí pa presentashonnan ku ta inspirá i pa ideanan inovativo. Tabata 7 dama ku a partisipá na e Speakers Pitch di siman pasá. Un hurado konsistiendo di 3 profeshonal, Nephtalie Demei, organisadó di TEDxCuraçao, Sinuhe Oomen, miembro di direktiva di fundashon TEDxCuraçao i tambe Kees Broere, koresponsal pa Volkskrant. E evento grátis patrosiná dor di Guardian Group Fatum a konta ku un públiko generoso pa presensiá e presentashon di e 7 partisipantenan.

Kada spich a dura 3 minüt i a varia di temanan manera, entrepreneurship, benefisio di Lionfish den Kòrsou su ekosistema i Kindness in the Office (Amabilidat den Ofisina.) Tabata difísil skohe 1 ganadó, pues a skohe tres! Dos orador i 1 presentadó. Kada un a bai kas ku 2 karchi di entrada pa TEDxCuraçao, un seshon ku un ‘Speaker Coach’ profeshonal i un presentashon durante di e evento prinsipal ku lo tuma lugá dia 14 di aprel próksimo. Pabien ta bai na, Nathania Engelhardt, Jocelyn Paonita i Noemi Elisa ku a resaltá grandemente durante di e Speakers Pitch di TEDxCuraçao.

Meta di TEDxCuraçao ta pa organisá un konferensia ku ta inová dor di trese un grupo di hende huntu den un ambiente dinámiko. Pa kompartí eksperensia, inspirá ideanan nobo i motivá otro. TEDxCuraçao ta enfoká riba union den nos komunidat i e manera kon huntu nos por kompartí ideanan ku tin un impakto positivo pa nos isla. E evento ku ta keda organisá dor di un tim di boluntario profeshonal ta klá pa su di 3 edishon, “Smashing Boxes”. Por kumpra karchi online via e página di Facebook di TEDxCuraçao i tambe na Miles Jazz Cafe, Bruna i Mensging’s Caminada. Pa mas informashon por bishitá e página di Facebook di TEDxCuraçao.