Djadumingu 8 di aprel Bellisima ta organisá WD 40 Bike Race 2018 pa koredónan di baiskel di kareda i di mountainbike. E kompetensha ta konsistí di 2 disiplina, kareda di baiskel riba kaminda asfaltá i kareda di mountainbike riba kaminda di tera.

Tur partisipante ta kuminsá mitar di 8 mainta na altura di e snèk na entrada di Mijnmaatschappij. E koredónan di mountainbike ta kore e promé parti riba kaminda asfaltá, pa despues kore off road via Dam Pretu, Aloe Farm, Seru Pretu,Cocorie, Ronde Klip, Playa Kanoa,Koral Tabak, St Jorisbaai i Choloma direkshon Fuik atrobe pa final. Un distansha di 47 km pa Elite, master A/B, dama i junior 17/18.  Pa nobato i junior e distansha ta 27 km.

E siklistanan ta kore rònchi di  6 km den Fuik. E parcours ta kore for di e snèk direkshon Sta Rosa, bai Seru Grandi, Fuik i bai bèk entrada di Mijnmaatschappij. E distanshanan ta dependé di e kategoria ku a inskribí p’e i ta varia entre 18 pa 84 km. Den tur dos disiplina tin diferente kategoria. Tin un kategoria pa hubentut 11/12, hubentut 13/14, junior 15/16, junior 17/18, mucha muhé 15-18, nobato, dama, masters A/B i elite.

Premionan di sprent di spònser pa Adequate Financial Services i Keesen Actuarissen

Pa e koredónan di Mountainbike tin 2 premio di  100 florin pa gana,di spònser pa Adequate Financial Services. Pa e koredó di mountain bike ku yega promé na e segmento di Strava (“Zandbak”), despues di e mulinanan di bientu na Koraal Tabak, i pa e koredó di mountainbike ku sali promé  di e Ottevanger trail na St Jorisbaai. Esakinan ta sitionan espektakular pa miradónan bin animá e koredónan di mountainbike.

E siklistanan por  gana e tussensprintnan ku tin riba e seru na Seru Grandi. Tin 5 tussensprint i ganadó di kada sprent ta gana 100 florin di Keesen Actuarissen. Un siklista por gana en total 500 florin.

Premionan Overall, trofeo i medaya

E promé 5 finalistanan overall di e kareda di baiskel di race i e 5 promé finalistanan overall di Mountainbike ta gana un WD-40 Bike products maintenance set na balor di f 85,00, di spònser pa Caribbean Fasteners. Pa e promé 3 finalistanan di kada kategoria tin trofeo i medaya pa gana. Despues di e kompetensha Coca Cola ta sòru pa ko’i bebe friu.

Siguridat pa usadónan di kaminda.

E kompetensha ta haña koperashon di Korps Politie Curaçao i boluntarionan ku ta regla siguridat di e siklistanan i di otro usadónan di kaminda. Curacaosche Wielerbond i klup di siklismo Bellisima ta pidi tur usadó di kaminda den besindario di e ruta pa tene kuenta ku e siklistanan  i sigui instrukshon di polis i boluntarionan. Siklismo ta un deporte ku mester hasi uso di kaminda públiko.

Inskripshon pa e kompetensha

Por inskribí pa e kompetensha te ku djasabra 7 di aprel. (15:00 ) na Vista Bike (Kaya Jombi Mensing 7 òf na Jan Noorduynweg 9) òf Dasia Sport na Kaya Flamboyan 1a.

Pa mas informashon;bellisimacuracao.com of Fb Bellisima Curaçao.