WILLEMSTAD:- Curaçao Growth Fund for di e siman aki ta ko-akshonista di FBTT Travel/Taber Tours Group; un di e kompanianan mas grandi i prominente den merkado turístiko na Kòrsou. E kompania ku a krese inmensamente durante di e último añanan tin un hopi bon reputashon i presensia den industria turístiko internashonal. E akshonistanan eksistente ku durante di e último añanan a pèrkurá pa kresementu di FBTT Travel/Taber Tours, lo keda involukrá den desaroyo di e kompania. Sr. Mark Verburg, lo tin e maneho diario entrante promé di aprel, i lo ta den funshon komo direktor general. Verburg, no ta deskonosí na Kòrsou, ya ku e tabata direktor di Fun Miles pa algun aña. Ku partisipashon di Curaçao Growth Fund e kompania lo tin un base aún mas sólido pa sigui sirbi nan klientenan, i tambe ekspandé su aktividatnan durante di e próksimo añanan.

FBTT/Taber ta un nòmber ya establesé den industria turístiko na Kòrsou, i tambe internashonalmente; e kompania ta aktivo for di aña 1959 den fasilitashon di turista riba diferente tereno. Taber Tours tin e flota di mas grandi di bùs na Kòrsou i ta sòru pa e transfer di aeropuerto pa hotèl di hopi turista, tambe ta duna tour na turistanan ku ta bishitá nos isla via di krusero. FBTT Travel ta representante lokal di sosionan di operadornan di tour internashonal, na Kòrsou. Ademas di sòru pa e transfer i e ‘meet & greet’ na aeropuerto di Hato, un tim grandi di hostess ta guia e bishitantenan durante di nan estadia. Tambe e kompania ta asistí su sosionan den komunikashon, selekshon i reservashon di akomodashon pa turista. E kompania tin un kuota di merkado grandi i fuerte na Hulanda, Alemania i Canada, esaki banda di asosiashon ku operadornan di tour na diferente otro pais.

Ademas, e kompania ta e proveedor mas grandi di tour i aktividat pa liñanan krusero ku ta bishitá Kòrsou. Debí na e surtido grandi di tour ku FBTT ta ofresé, turistanan krusero ta realisá bishita na diferente atrakshon turístiko, museo i sitionan impreshonante- di e manera aki hopi bishitante internashonal ta sera konosí ku nos bunita isla. E tim grandi di eksperto i guianan turístiko, ku ta dominá vários idioma ta duna bishitantenan internashonal  informashon di Kòrsou i ta pèrkurá huntu ku shofùrnan profeshonal, pa un estadia inolvidabel. Banda di e aktividatnan aki, e kompania ta sòru pa transporte pa otro klientenan lokal i internashonal, ademas ta krea programanan atraktivo pa gruponan ku ta bishitá e isla. Na 2017 FBTT Travel a kuminsa un operashon na Boneiru tambe i einan tambe ta premirá un kresementu den e próksimo añanan.

FBTT Travel ta duna un kontribushon grandi na promoshon di Kòrsou den eksterior, esaki den kolaborashon ku CTB, CHATA i Curaçao Ports Authority. E kompania ta trahando duru pa den un futuro serkano agregá mas aktividat na su portofolio i di e manera ei sirbi su klientenan aún mas mihó, prinsipalmente pa optimalisá e eksperensia positivo di e turista na Kòrsou. Pa Curaçao Growth Fund e partisipashon tabata un oportunidat úniko pa bira aktivo den un di e sektornan mas importante i kresiente den nos ekonomia lokal, turismo. Erik Baas i Justus Martens ta komentá ku e ambishon di e CGF ta bai mas leu: “E industria turístiko na Kòrsou ainda no yega su potensial máksimo, i nos ta konvensí ku tin hopi espasio pa kresementu. Kòrsou den komparashon ku otro destinashonnan, tin muchu mas pa ofresé i por sigui krese dor di e propio turista ku ta kompartí su eksperensia ora e yega kas bèk, dor di mihó konekshon aéreo i mas promoshon. Nos ta mira FBTT Travel/Taber komo un plataforma fantástiko, pa tambe den nòmber di APC duna un kontribushon na kresementu di e industria turístiko den nos ekonomia lokal.”