Pa di 7 biaha Kòrsou lo organisá Curaçao International Film Festival Rotterdam (CIFFR), di djarason 11 di aprel pa djadumingu 15 aprel 2018. CIFFR lo presentá e highlightnan di e mas resien edishon di IFFR, i tambe lo presentá pelíkulanan nobo di otro festival di nos region, ademas di trabounan nobo i prometedor di den Karibe, speshalmente den su edishon di Yellow Robin Award i Caribbean Shorts Competition.
E aña aki nos ta habri ku e debut di e obra vibrante di Gustav Möller titulá The Guilty, ku a gana e premio di públiko den e festival IFFR 2018. E aktor prinsipal di e obra aki, Jakob Cedergren lo tei presente na e apertura. I nos ta klousurá e festival ku e pelíkula Film Stars Don’t Die in Liverpool di Paul McGuigan, I ku aktuashon espektakular di Annette Being. E selekshon di produktornan di region ta enserá e.o produktornan di Kòrsou, Sharelly Emanuelson (Yamada) i Felix de Rooy (Mundu Mistico).
CIFFR
Na 2012 CIFFR, Fundashon Bon Intenshon a sera un kolaborashon ku International Film Festival Rotterdam (IFFR). For di e tempu ei e festival a resultá un plataforma pa e.o hóbennan lokal i a produsí pelíkulanan di largo metrahe, dokumental i short films di Kòrsou i di rònt mundu.
Direktor Bero Beyer (IFFR): “CIFFR ta ofresé un bunita meskla: 5 dia pa selebrá pelíkula independiente riba un isla bunita ku semper ta un luga di enkuentro pa diferente kultura.Bo ta haña representashon di tantu direktornan mundialmente konosí, komo esnan ku ta preparando pa subi e trapi di fama, ku ta resultá den un meskla uniko di diferente perpektiva. E selekshon di e di 7 edishon aki tin algun pelíkula uniko i otro i lo atraé un públiko varia.”
Yellow Robin Award Competition
Pa di 6 biaha CIFFR ta presentá Yellow Robin Award Competition, den kua 5 pelíkula di produktornan di Karibe i Latino Amerika ta kompetí pa e Yellow Robin Award. Esnan nominá e aña aki ta: Khalik Allah su Black Mother (Jamaica, United States), Gustavo Ramos Perales El chata (Puerto Rico), Luis i Andrés Rodríguez Hijos de la sal (Venezuela), Vashti Anderson Moko Jumbie (Trinidad i Tobago, United States) i Álvaro Aponte-Centeno El silencio del viento (Puerto Rico, Dominican Republic, France). Un hurado internashonal lo saka e pelíkula ganador, ku ta garantisá di partisipashon den e programa Bright Future di IFFR 2019 I tambe na e festival Internashonal di Morelia, Mexico, mas lat e aña aki. Tambe e ganador lo risibí un preis cash di $2,500 i tambe training i partisipashon den desaroyo di talento, na balor di $7,500 den programanan manera BoostNL òf CineMart.
Caribbean Shorts Competition
Aña pasá CIFFR a introdusí Caribbean Shorts Competition, i e aña aki ta su di dos edishon. E programa aki ta resultado di un akuerdo entre 6 festival di sine di regio. Festival di Cuba, Repúblika Dominikano, Martinique, Mexico, Trinidad i Tobago i CIFFR a manda un pelíkula kòrtiku aden pa partisipá na e kompetensia Caribbean Short. E pelíkula ganador lo pasa na tur e festivalnan aki.
Programa
Banda di e kompetensianan aki, e di 7 edishon di CIFFR tin un programa speshal titulá: Scenes of Senses ku ta demostra, ku pelíkula no ta stimulá bista so, pero tambe otro sentidonan. Lo tin un programa edukashonal ekstensivo i tambe e tema di músika ku CIFFR ta bolbe presentá. Entre e binti piku pelíkula nan highlight di IFFR 2018 ku lo pasa den e festival di Kòrsou tin The Insult di Ziad Doueiri, The Florida Project di Sean Baker i tres pelíkula ku a pasa den e kompetensia di Hivos Tiger, entre otro e obra ku a gana Special Jury Award i e HBF Audience Award The Reports on Sarah and Saleem di Muayad Alayan.
Lo anunsiá e programa kompleto riba nos wèpsait I tambe den nos buki di programa riba djaweps 5 di aprel na The Cinemas, The Movies i Mensing’s Caminada..
Pre-view 5 di aprel
Djaweps 5 di aprel lo tin un preview den The Cinemas di un pelíkula di festival: The Party. E pelíkula ta kuminsá 19.30 I por kumpra karchi for di 29 di mart na The Cinemas. Den The Party di regisor Sally Potter, Janet (Patricia Clarkson) ta organisá un fiesta ku su mihó amigunan pa selebrá su promoshon. Pero na momentu ku e fiesta kuminsá, ya ta bisto ku no ta tur kos ta kana manera mester ta. Den simannan ku ta sigui nos lo anunsiá mas título.