‘Time for jazz’ djasabra awor na Avila Beach Hotel

WILLEMSTAD – Ta djis un par di dia falta pa Randal Corsen Trio duna e konsierto ‘Time for jazz’ djasabra awor den La Belle Alliance di Avila Beach Hotel. Den e simannan ku a pasa Randal Corsen (piano), Eric Calmes (baho) i Pernell Saturnino (drùms) a enseyá pa no laga niun duda enkuanto nan motivashon i dedikashon pa duna un konsierto di kita sombré atrobe.

Pa e konsierto aki e énfasis lo ta spesífikamente riba e harmonia ku ta eksistí entre e tres integrantenan, di tal forma ku e ta laga sufisiente espasio pa kada un di nan improvisá na nan antoho. Den e kuadro aki ta interesante pa menshoná ku den e preparashonnan Eric Calmes a trese su kontrabaho for di Hulanda pa usa esaki atrobe. Ta relevante pa agregá ku Randal Corsen tin e chèns pa toka riba e tremendo piano di kola di e marka Bösendorfer ku tin den e sala aki.

Sin mas e aksento lo ta riba jazz, pero tòg alabes hopi variá i no nesesariamente kompliká. Nan a prepará piesanan di jazz standardisá, pero tambe piesanan di latin jazz, ritmonan lokal, jazz kontemporáneo i te hasta bebop – e trio aki ta dominá tur e géneronan aki pa por fasiná e oudiensia. Nan lo toka algun komposishon di Randal Corsen, pero tambe piesa klásiko i folklóriko ku el a adaptá i areglá spesialmente pa un ambiente di jazz.

Djasabra awor e konsierto ta kuminsá 8 or di anochi den e sala La Belle Alliance di Avila Beach Hotel den Pèn. Karchinan ta kosta 45 florin pa persona i ta optenibel na Mensing’s Caminada i frònt dèsk di Avila Beach Hotel. Konosedónan lo ripará ku programa lo kontené karakterístikanan di trionan famoso di piano manera di Keith Jarrett i Bill Evans ku pa Randal Corsen ta ehèmpelnan musikal di taya.