Direktor Justus van der Lubbe di Inter-Assure

WILLEMSTAD – Komo promé kompania lokal di seguro Inter-Assure Insurance a sera su bukinan di 2017 ku ganashi i a risibí un deklarashon di aprobashon di BDO Accountants. Tòg direktor Justus van der Lubbe ta prekupá ku gobièrnu ta faya pa aktua kontra e kantidat grandi di infrakshon kontra reglanan di tráfiko, motibu pa kua kompanianan di seguro ta bin den pèrtá pa e oumento kontinuo di gastunan di daño.

“Si gobièrnu aktua atraves di e instansianan kompetente na ora, di forma preventivo i strukturalmente kontra esnan ku ta violá reglanan di tráfiko, di mes e ora ei tin ménos aksidente. Te hasta ta asina ku e momento ei e kompanianan di seguro no mester direktamente un adaptashon di e tarifanan ku a keda atras pa seguro di vehíkulo”. Esei e direktor di Inter-Assure ta altamente konvensí di dje.

Lei antikuá

Awor ta e kompanianan di seguro ta haña nan ta karga ku e konsekuensianan kostoso di e aktitut deskabeyá i iresponsabel den tráfiko di tur dia na Kòrsou. No ta adaptá leinan antikuá na e sirkumstansianan ku a kambia. No ta hasi tèst di alkohòl, pasobra e lei falta e provishon pa esei. Ministerio Públiko ke si, pero nan ta frustra nan den e afan aki. Na 2016 nan a skirbi dos proposishon di lei ku mientrastantu a pasa tres diferente minister di hustisia. Ta poko dia ei tabatin otro morto den tráfiko komo konsekuensia di konsumo dimas di alkohòl. E legisladornan (polítikonan) no ta sinti e nesesidat pa adaptá e leinan. Meskos ta konta pa e kámaranan pa detektá esnan ku ta pasa den lus kòrá di tráfiko. Tuma tambe e kantidat kresiente di vehíkulo ku stürwil na man drechi. Mucha ta para riba stul dilanti, sin ta mará ku faha di seguridat. Ta kore outo mandando mensahe riba telefon. Sporádikamente ta tene kontròl di tráfiko, di moda ku e chèns pa nan gara bo den tráfiko ta hopi abou. Asina outomobilistanan iresponsabel ta skapa. Nan ta haña nan envolví si den aksidentenan, pero e ora ei ya ta lat. Den hopi kaso e kompania di seguro mester paga numa ora no tin sufisiente prueba disponibel. Komosifuera ta nada, e outomobilista iresponsabel ei ta drenta un outo bèk i e ta forma un riesgo pa otronan atrobe. Si aktua kontra esnan ku ta violá reglanan di tráfiko, esaki lo kondusí na ménos aksidente, ménos pago pa daño kousá, ménos daño na e infrastruktura, primanan pagabel i ménos tristesa humano a konsekuensia di heridanan i aksidentenan ku konsekuensia fatal. Ta na gobièrnu pa aktua!

Relato di aktuario

Pa e aña atministrativo 2017 Inter-Assure a bolbe haña sertifikashon di Couperus Actuariële Adviesgroep. For di esaki por dedusí ku Inter-Assure a determiná e provishonnan riba balans adekuadamente i ku e konvenionan di re-aseguro ta sufisiente, pues, ku e tin un portafolio sano ku un norma di solvensia di 140%. Esei ta mas ku sufisiente sólido pa asistí klientenan ku haña nan ku un kontratiempu. Ku un resultado positivo di 235.000 florin promé ku impuesto, Inter-Assure a mira su kapital propio krese atrobe. Apesar di Kòrsou su ekonomia krekeché i stanká, Inter-Assure ta mira su kantidat di kliente i su volúmen di benta subi. Aparte di produktonan bon i pagabel, ta hopi importante di tin empleado ku ta dediká i kapas. “I esei nos tin”, segun señor Van der Lubbe. Pa loke ta e promé kuartal di e aña nobo, Inter-Assure a kuminsá atrobe ku sifranan positivo i ku konfiansa e ta premirá e kresementu di e empresa.