Despues di selebrashon di e diferente aktividatnan i ku e kulminashon di e marchanan di Karnaval 2018, entrega di premio ta e evento ku gruponan i pueblo di Kòrsou ta enespera. Esaki lo tuma lugá djadumingu 18 mart próksimo na Marjorie’s Party Palace ( pega ku Hòfi Bill ), di 3’or mèrdia pa 6’or atardi lo entrega premio na Elekshon nan Hubenil, Festival di Tumba Hubenil, Marcha Hubenil i Marcha di Kabai 2018.

I di 7’or anochi pa 11’or di anochi lo entrega na Elekshon nan Tiner i Grandi i Marchanan di Tiner i Grandi 2018. Karchi nan pa e okashon aki ta limitá i ta optenibel na telefon 526 0475 òf djaweps i djabièrnè di 7’or anochi pa 10’or na Roodeweg 174 i djasabra mainta di 10’or pa 2’or di mèrdia.

Preis pa karchi lo ta fl. 5,– pa mucha i fl. 10,– pa adulto.

Fundashon J.A.G. ta gradisí hinter pueblo di Kòrsou un biaha mas pa a duna di nan parti tambe pa por a hasi e temporada di Karnaval 2018 unu asina grandi i eksitoso.