Willemstad- Curaçao Beverage Bottling Company (CBBC) ta un fábrika lokal i orguyoso produktor di un di e bebidanan mas konosí i gustá mundialmente ku ta Coca-Cola. Dia 12 di òktober próksimo e kompanía ta selebrá su di 80 aniversario aki na Kòrsou i Curaçao Beverage Bottling Company ta selebrá esaki ku komunidat. CBBC, for di un inisio na 1938, tabata un kompania komprometé ku desaroyo i bienestar di Kòrsou. E selebrashon di e 80 aña tambe lo ta un refleho di e kompromiso aki. Na un forma simbóliko a desvelá e ‘billboard’ bunita di aniversario na e parti dilanti di e fábrika na Kaya Dominico F. “Don” Martina. Gerensha huntu ku e mas di 120 empleadonan a inisiá e selebrashon, unu ku lo dura henter aña.

Kompromiso di Curaçao Beverage Bottling Company ku Kòrsou

Riba 12 di òktober 1938 CBBC a kuminsá bou di direkshon di Shon Vic Pinedo i te awe su susesornan ta sigui duna guia na e fábrika aki. Curaçao Beverage Bottling Company ta un kompania ku ta produsí Coca-Cola, Coca-Cola No Sugar; Coca-Cola Light Taste, Sprite i e produktonan ku sabor lokal manera Fria, Coco Rico i Criollita. Banda di esei CBBC ta responsabel komo importadó di e produktonan Fuze Ice tea, Vitamin Water, Powerade, Minute Maid i awa Dasani. CBBC su liña di produktonan ta brinda na kada persona e produktonan di su eskoho. Importante den esaki ta e balansa, meskos ku un bida bon balansá semper ta ideal.

Sr. Andrew Pinedo, Assistant Managing Director di CBBC ta bisa”: ‘Selebrashon di e 80 aniversario di Curaçao Beverage Bottling Company i Coca-Cola na Kòrsou ta tantu un homenahe na nos pasado riku komo un kontribushon na nos komunidat. Nos ta orguyoso di por a inisiá e selebrashon aki ku esnan ku día den día afó ta hasi lo máksimo pa un i tur por saboriá e diferente produktonan ku nos ta produsí i distribuí, esta nos empleadonan. Durante e aña di selebrashon nos komunidat di bèrdat lo sinti e sensashon di e selebrashon di un kompania propio lokal, ku tei pa kontribuí hopi aña mas na bienestar di nos pueblo.”

Sinti e sensashon di e selebrashon

Selebrashon di 80 aña di CBBC i Coca-Cola na Kòrsou lo ta variá. E ta kai nèt na momentu ku nos ta selebrá mundial di futbòl na Rusia. Coca-Cola komo patrosinadó di e magno evento aki ta laga rònt mundu sinti e sensashon, i Kòrsou lo no ta un eksepshon. Coca-Cola ta orguyoso di su tradishon di sponsor deporte rònt mundu i aki na Kòrsou nos ta duna sosten na diferente ekipo di beisbòl, futbòl i otro ramo di deporte lokal. Tambe tur esnan ku ta saboriá e refreskonan di CBBC lo tin chèns di gana un biahe pa “The world of Coca-Cola’ na Atlanta na Merka pa kuater persona.

Edukashon i arte ta algu ku ta move un pueblo den su desaroyo. Pa motibu aki CBBC den e aña aki di aniversario lo ofresé un hóben e oportunidat pa risibí un beka pa studia na Kòrsou. Banda di esaki lo invertí den algun proyekto pa edukashon di e muchanan na algun skol rònt Kòrsou.

Arte meskos ku edukashon ta un vehíkulo ku ta yuda un pueblo, prinsipal nos hóbennan, manifestá nos potenshal. CBBC i Coca-Cola ta kere den desaroyo di arte i kultura. Prueba di esei ta ku CBBC i Coca-Cola ta sostené nos máksimo ekspreshonan kultural esta Karnaval i Seú den grandi. CBBC ta orguyoso di por ta un di e ko-patrosinadónan di Curaçao International Film Festival Rotterdam 2018 ku ta tuma lugá den aprel próksimo. Otro proyekto ku lo laga un impakto grandi i positivo riba nos sentro di siudat ta e proyekto ‘Street Art’.

Invershon kuantioso riba tereno di resiklahe

Sostenibilidat i preservashon di nos planeta i naturalesa ta algu ku semper CBBC ta para pe. Asina CBBC riba propio inisiativa a start e proseso di resiklahe di awa (‘Waste Water Treatment Program’) na su fábrika. Tur awa usá den produkshon ta pasa via sistemanan moderno i bai e instalashonnan na Klein Kwartier pa pasa den e proseso di resiklahe promé ku usa e awa aki bèk pa irigashon den nos sentro di siudat. E aña aki CBBC, komo parti di su aña di aniversario lo hasi un invershon kuantioso den e fasilidat di Green Force komo parti di e kompromiso di sigurá ku Kòrsou por sigui desaroyá riba tereno di resiklahe i no ta keda isolá ku nos produktonan residual. Aparte di esaki CBBC lo invertí tambe den un programa speshal di edukashon di nos hóbennan riba tereno di resiklahe.

Gerente di benta i merkadeo sra. Myrthe George-Verhulst finalmente ta añadí: ‘Nos ta gradisido ku durante di e 80 añanan tras di lomba nos por a sirbi Kòrsou i Boneiru ku nos produktonan. Nos ta konsiente i ta realisá ku nos lo no por a logra esaki sin sosten i entusiasmo di komunidat. E programa aki ta nos forma moderá pa duna bèk na nos isla. Nos ta konvensí ku e aña aki no únikamente nos lo bin ku kampañanan fantástiko, sino tambe ku invershon balioso den desaroyo di nos isla. Ku plaser i gratitut awe nos a duna inisio na selebrashon di nos 80 aña di eksistensia!”.