Willemstad – E akshon di ‘Early Bird’ pa Curaçao Ponton Festival tabata un éksito na Van den Tweel Zeelandia. Djasabra último, un gran kantidat di bishitantenan di e festival a para den rei for di 9’or di mainta pa kumpra un karchi general i karchi ‘VIP’ na un preis redusí.
Siman pasá organisadó Sumusica Curaçao B.V. a anunsiá un akshon di ‘Early Bird’ pa duna mas tantu hende posibel e oportunidat di presensiá Curaçao Ponton Festival. E benta ofishal di e akson di ‘Early Bird’ tabata durante 10’or di mainta i 6’or di atardi. Tin hopi interes pa e promé edishon di Curaçao Ponton Festival i e benta di karchi ta un muestra di esei.
Mas ku 1000 karchi di e festival a wòrdu bendé na un preis redusí. Un kantidat limitá di karchinan general i ‘VIP’tabata disponibel durante e akshon na preis respektivamente di Naf 50 i Naf 175 pa anochi. E karchinan di ‘VIP’ ta inkluí 10 bibida ‘premium’ manera kòktel, shampaña, ròm, wiski, vodka i biña. “Mi ta sumamente kontentu ku e reakshonnan positivo ku nos a haña. Personanan di diferente edat na Kòrsou i otro paisnan ta reakshoná ku entusiasmo tokante e ‘line’up’ di e festival. Esaki ta duna nos energia pa realisá ku Curaçao Ponton Festival ta bira un evento annual”, Gisgard Felida, direktor di Sumusica Curaçao B.V. ta indiká.
Dia 5,6 i 7 di aprel e promé edishon di Curaçao Ponton Festival ta tuma lugá riba Brionplein i Kleine Werf. E festival di muzik ta konistí di un programa atraktivo ku famoso artistanan lokal i internashonal. Riba djaweps 5 di aprel lo tin un konsierto kompletamente grátis ku Son de Tikizia, Randal Corsen Orchestra i Arnell Orchestra riba Brionplein. Djabièrnè 6 di aprel ta e anochi di músika ‘urban’ i ‘hip hop’. Jeon, Hef, Ronnie Flex, Rich Kalash i Grupo Extra ta e artistanan prinsipal pa djabièrnè anochi. E delaster anochi amantenan di reggae i rock por disfrutá di artistanan grandi manera Morgan Heritage, ganadó di premio ‘Grammy Award’ i e grupo RockPack kual ta konsistí di e siguiente artistanan renombrá: Bill Champlin, John Elefante, Fran Cosmo i Alex Ligertwood. E artistanan aki respektivamente tabata forma parti di e banda legendarionan di rock Chicago, Santana, Boston, Journey i Kansas.