ORANJESTAD, Aruba – 7 di Maart 2018: Tropical Bottling Co. a cera un partnership cu Aruba Summer Music Festival y e aña aki e evento aki lo ta un di e mas grandi di Aruba, di cual e aña aki ta organisa e di 4 edicion. E aña aki Dewars ta un di e sponsornan principal di Aruba Summer Music Festival 2018.
Despues di lunanan di combersacionnan a logra cera un partnership cu Aruba Summer Music Festival pa asina aki Tropical Bottling Co. cu su marcanan Chill y Dewars lo ta e marcanan di e evento. Mitch Bermudez, representante di Balashi, a expresa cu durante e festival di dia 29 y 30 di Juni lo bende tur producto di Tropical Bottling Co.
Un di e marcanan cu lo ta presente durante e festival ta Dewars y nan ta orguyoso di a bin cu esaki dilanti, asina Lizzi Arendsz, representante di Dewars, a expresa. Dewars lo ta ehecutando diferente campaña durante e luna di Juni te dia di e Aruba Summer Festival. Lo bay tin diferente premio manera entrada, goodies di Dewars.
Pa Aruba Summer Music Festival ta un honor pa tin Tropical Bottling Co. hunto cu e productonan di Chill y Dewars, asina Darren van Ommeren di Aruba Summer Music Festival, a expresa. Esaki ta prome aña cu a logra e partnership aki, ya cu desde algun aña caba Aruba Summer Music Festival tabata purbando di logra esaki. P’e organisacion ta un honor y alegria di tin Chill y Dewars di Tropical Bottling Co. hunto cu nan.
Tur hende por busca nan ticket ainda na Sandra’s Garden di dialuna pa diasabra di 3:00 di atardi te cu 9:00 di anochi. Ainda por haya e ticketnan na prijs special y na cualkier momento esaki por cambia, specialmente pa dia 29. E ticketnan ta bayendo lihe, asina Darren van Ommeren a expresa. E prijs pa entrada general pa dia 29 y 30 di Juni ta 100 florin, prijs pa VIP Standing ta 175 florin, e gold seated pa diabierna 29 di Juni ta 225 dollar, e diamond standing dilanti di e scenario ta 250 florin. Diasabra 30 di Juni e gold seated ta 175 dollar y diamond seated ta 250 dollar. E organisadonan ta recorda tur esunnan cu kier sinta of ta dilanti e scenario pa haci nan reservacion di trempan pa asina nan no keda afo.