WILLEMSTAD- Lito, e Amiguitu Spardó komo parti di e proyekto “Kuida Bo skol i stima Bo skol”, ta organisá huntu ku SEDREKO i Curaçaose Atletiek Bond djadumingu dia 1 di desèmber Kareda di Lito. E kompetensia di korementu entre skolnan di Fundeshi den kual e alumnonan por gana premio pa nan skol. Kareda di Lito ta start paden riba e vèlt di SDK i algun mucha ta kore rònt di SDK. E kareda ta start 3 or di atardi. Inskripshon pa Kareda di Lito a sera i preparashonnan grandi ta tumando lugá pa Kareda di Lito e aña aki atrobe ta unu eksitoso. Kareda di Lito ta konsistí di diferente kategoria; Grupo A: 6 i 7 aña (premio pa mucha muhé i mucha hòmber separá) ta kore 700 meter; Grupo B: 8 i 9 aña (premio pa mucha muhé i mucha hòmber separá) ta kore 700 meter; Grupo C: 10 i 11 aña (premio pa mucha muhé i mucha hòmber separá) ta kore 1.600 meter; Grupo D: 12 i 13 aña (premio pa mucha muhé i mucha hòmber separá) ta kore 1.600 meter. Number 1 di e  diferente kategorianan aki lo risibí kada NAf. 1.000,–; number 2 lo risibí NAf. 500,– i number 3: NAf. 250,– pa proyektonan pa nan skol. Un total di 24 premio. Pues kada skol tin 24 chèns pa gana premio pa nan skol, ku por keda aloká pa proyektonan pa e muchanan i e skol. Mas mucha partisipá mas chèns e skol tin pa gana premio.  Di kada kategoria, e promé 10 finalistanan ta risibí un bunita medaya serka Lito. Tur mucha ku partisipá ta haña un bunita T-shirt di Kareda di Lito pa nan kore aden i naturalmente nan por keda kuné komo rekuerdo. E aña aki lo tin un sorpresa agradabel pa tur mucha ku kore pa nan skol.

Informashon importante

Tur skol por buska T-shirt di e muchanan ku a inskribí na Sedreko na Landhuis Hel riba djarason 27 di novèmber di 8 or di mainta pa 12 or di mèrdia i djaweps 28 di novèmber di 8 or di mainta pa 12 or di mèrdia i di 2 or di mèrdia pa 6 or di atardi. Si dado kaso un skol falta T-shirt òf mester kambia T-shirt por hasi esaki solamente riba dia di kareda ku ta djadumingu 1 di desèmber di 12 or di mèrdia pa 2 or di atardi na SDK.