Selikor ta rekordá tur persona òf organisashon ku ta hasi uso di servisio di un transportadó privá di shushi, ku e transportadó por eksigí di nan pa yena e formulario ku kua nan ta deklará di ta para responsabel pa gastunan mará na deshasí di nan shushi. Tur ku ta hasi uso di un transportadó di shushi lo por risibí e formulario enkuestion ku e petishon pa kompletá i firma esaki. A base di e formulario akí Selikor lo fakturá doño di e shushi e gastunan di prosesamentu di shushi na Lèntfel.

Na yüni 2015 , huntu ku representantenan di e transportadónan di shushi i tambe ku Ministerio di Salubridat Públiko, Medio Ambiente i Naturalesa (GMN), a yega na un akuerdo pa atendé e reklamo di transportadónan ku Selikor ta pone nan finansieramente responsabel pa prosesamentu di shushi ku no ta di nan. E akuerdo a enserá ku Selikor ta fasilitá tur transportadó di shushi ku un formulario ku nan por usa na momentu ku nan ta bai transportá shushi pa un kliente.

E punto di salida ta ku kada persona ku ta produsí shushi mester karga ku e gastunan pa deshasí di esaki di forma responsabel. Na momentu ku doño di e shushi hasi uso di servisio di un transportadó privá, e último akí por eksigí e doño pa yena e formulario ku Selikor a diseñá. Yenando e formulario doño di e shushi ta aseptá e responsabilidat finansiero pa kubri e gastunan mará na prosesamentu di su shushi i asina evitá ku Selikor ta fakturá e transportadó pa e gastunan akí. Ta importante pa e formulario ta kompleto i korekto yená i huntu ku e formulario e doño di shushi mester entregá un kopia di identifikashon bálido.

Entretantu Minister di GMN, Suzy Camelia-Römer a deklará, na reinstalashon di Xtim, ku outoridatnan konserní lo bai aktua ku man duru kontra tur esnan ku ta hasi nan mes kulpabel na deshasí di shushi na sitionan ilegal. Un apelashon ta bai pues na komunidat kompleto pa hinka transporte di bo shushi den man di transportadónan responsabel ku lo bai depositá bo shushi na e úniko sitionan legal pa hasi esaki ku ta na Lèntfel Malpais òf Transbordo di shushi na Koraal Specht. Despues ku e transportadó kaba di depositá bo shushi eksigí un komprobante di dje ku el a hiba bo shushi na un di e dos sitionan legal. Komo doño di shushi bo ta keda responsabel pa bo shushi. Si no kumpli ku lei doño di shushi por wòrdu pèrsigui pa hustisia. Laga nos evitá situashonnan desagradabel dor di kumpli ku nos deber i obligashon ora nos ta atendé ku nos shushi, pasó t’asina ta hende.