WILLEMSTAD- 25 di novèmber 2013 – Ofisina di Turismo di Kòrsou (CTB) tabatin un temporada sumamente interesante den kual a partisipá na diferente trade events, roadshows i feria di biahe pa asina duna kontenido na e meta prinsipal di CTB Europa (CTBE); ku ta di promové Kòrsou den e industria di turismo Europeo. CTBE por ta satisfecho ku resultadonan di trabou alkansá den e temporada tras di lomba. A partisipá den e.o 50PlusBeurs ku a tuma lugá na Utrecht, na unda Kòrsou a sobresalí ku su info booth ku a konta ku partisipashon di diferente hotèl lokal pa asina duna mas tantu informashon posibel na e 100.000 bishitantenan di e feria. Despues a sigui ku partisipashon na e Curaçao Trade Markets kual tabata un roadshow dediká na Kòrsou i organisá espesialmente pa agentenan di biahe na Europa pa asina duna un bista mas amplio di Kòrsou i ofresé oportunidat pa negoshá ku hotèlnan lokal. E roadshow aki a bishitá 4 diferente suidat; Ridderkerk, Volendam, Eindhoven i Apeldoorn. E Nochi Krioyo kombiná ku un workshop karibense na Antwerpen riba e boto ‘Badboot’ kual ta e pisina flotante mas grandi na mundu. A kombertí e boto aki den un isla karibense riba kual Kòrsou a keda presentá na agentenan di biahe di Bèlgika. Pa finalisá e temporada di promoshon aktivo aki CTBE a organisá un Nochi Karibense na restorant ‘Bij de Buren’ na Lelystad, a invitá Travel Counsellors pa e anochi aki den kual a probechá e okashon pa duna un presentashon interaktivo di Kòrsou i alabes brinda informashon adishonal na esnan ku tabata deseá esaki. CTBE a probechá kada okashon pa presentá nos produkto den e industria di turismo Europeo. Ta importante pa suprayá ku promoshonnan grandi i di impakto pa Kòrsou no por keda realisá dor di CTBE só, semper mester gradisí tur partner den industria, spesialmente tur hotèlnan ku na momentu ku nos ta ekstendé un invitashon pa nan partisipá na diferente trade events òf roadshows ta duna nan máksimo pa kumpli ku e meta komun, ku ta esun di keda posishoná Kòrsou komo un destinashon faborito den Karibe.