WILLEMSTAD – Pa medio di e komunidado aki, boso amigu i sirbidó ta yama danki na promé lugá na nos Kreador pa a iluminá mi kaminda durante di e trayekto pa prepará pa Festival di Tumba 2018, durante di mi presentashon na e festival ku a kulminá den un rekonosementu pa nos trabou ku e premio máksimo komo Rei Tumba 2018. E temporada ku a sigui tabata unu ekstensó i ku bendishon di Dios nos a karga e responsabilidatnan ku esaki ta trese kuné ku hopi onor. Pa gradisí tur hende individual no ta na fásil, pero sin ke pone ningun aporte i sosten den un grado mas altu ò abou ku otro tòg mi ke gradisí algun persona i organisashon ku tabata hopi vital pa nos por a kumpli ku e responsabilidatnan. Un palabra di gratitut ta bai na mi famia, mi kompositor Darwin Gregg, na kolega mussiko i amigu Ike Jesurun, na mi areglista Ravello Antoin, na e agrupashon Buleria i su lider Dwight Leoneta, Tambe na tur agrupashon musikal ku a kompañá mi den e jump-ins, jump-ups, i Marchanan. Na sr. Gunnar Riedel ku a perkurá pa mi bookingnan i agènda di presentashon. Na sr. Aimed Ayoubi ku a invitá nos pa a presentá na Boneiru. E diferente patrosinadónan pa nan sosten finansiero. Mi koleganan di trabou i minister enkargá ku e kartera di GNM. Na miembronan di prensa, DJ’s, ku  tabata ku mi, no solamente aworakí, pero semper, E lista ta birando largu i sin ke lubidá niun hende, un danki grandi na mi pueblo di Kòrsou den su totalidat. Finalmente mi ke pidi pa petishon pa mi presentashonnan komo Rei di Tumba despeus di temporada di Karnaval tuma kontakto ku sr. Gunnar Riedel pa asina e bookingnan kana smooth i ordená. Masha danki i ‘Ban sigui tira lus riba Kòrsou.’

Un sirbidó i amigu Urvin ‘Luwi Yano