Willemstad, 08 febrüari 2018 – Djárason atardi durante su apertura di aña CHATA a presentá e edishon 2018 di ‘In Curaçao’. ‘In Curaçao’ ta CHATA su in-room magazine ofisial ku eksklusividat den kambernan di hotèl aki na Kòrsou. Esaki ta e di  4 edishon na enkargo di e kompania lokal Fortress Interactive NV. Konhuntamente ku CHATA, Fortress Interactive a introdusí ‘In Curaçao’ na komienso di 2014 ku e meta pa krea kontenido balioso pa e bishitante, pa laga e bishitante sera konosí ku Kòrsou, ku nos hendenan i tur lokual nos isla tin di ofresé.

Pa e edishon 2018 a introdusí e konsepto di ‘Travel Types’. Kòrsou tin asina tantu eksperensia pa ofresé diferente tipo di bishitante i ‘In Curaçao’ a skohe pa enfoká riba algun tipo di biahero spesífiko. E ‘Adventure Seeker’ ta esun ku ta buska aventura i adrenalina; bo tin tambe e ‘No Hassle Traveler’ kual ta esun ku ta buska e Instagram shòtnan durante su biahe i ta bastante sosial; e ‘Gentle Explorer’ ta esun ku ta gusta luho; e ‘Cultural Explorer’ ta esun ku ta bini pa nos kultura i ke sera konosí ku nos hendenan; i por último bo tin e ‘Foodie’ ku ta esun ku ta biaha pa eksperensiá tur aspekto kulinario di un destinashon, alabes bo por mira e ‘Foodie’ parsialmente bèk den tur biahero. A skohe pa kuminsá ku e tipo di biaheronan aki, mirando ku Kòrsou tin sufisiente pa ofresé kada un di nan, di forma ku nan lo por tin un eksperensia inolvidabel aki na Kòrsou.

Ultimamente Fortress Interactive a bin ta traha riba algun plataforma digital pa sostené e sektor di Turismo i alabes yuda kompletá i komplimenta e eksperensia di e bishitante durante tur fase di su biahe. E plataformanan aki lo ta direktamente konektá ku e konsepto di ‘In Curaçao’. “Kòrsou komo un isla den Karibe i tambe nos produkto turístiko ta di hopi balor i ku un potensial inmenso. Lokual falta ta pa nos mes kuminsá realisá esaki, pone tur nanishi den mesun direkshon i traha huntu pa nos progresá. Komo un digital Marketing & Communication Agency, nos di Fortress Interactive ta traha tur dia inkansablemente pa por kontribuí na progreso i kresementu di nos dushi Kòrsou.” Palabranan di Reyeanne Goilo, co-fundadora di e kompania i un hoben profeshonal ku un gran amor pa su isla.

Fortress Interactive kier invitá i motivá un i tur pa durante aña bira turista riba nos mes isla. Diskubrí i eksperensia Kòrsou. Bo tabata sa ku nos tin 3 brùg natural aki na Kòrsou?
Keda den un di e akomodashonnan miembro di CHATA i asina tira un bista den ‘In Curaçao in-room magazine’, sera konosí un tiki más ku nos isla, nos hendenan i nos ‘Local Secrets’. Like i Follow @InCuracao riba Facebook i Instagram pa disfrutá di bunita imágennan i tambe más informashon di nos isla.