WILLEMSTAD- 2 di febrüari 2018 – Den kuadro di e kampaña di konsientisashon ‘Kòrsou ta dushi’, Ofisina di Turismo di Kòrsou (CTB) ta invitá komunidat pa demostrá ku Kòrsou ta dushi durante e temporada di Karnaval tambe.

‘Kòrsou ta dushi. Bib’é. Stim’é!’ ta e kampaña di konsientisashon ku CTB a lansa aña pasá ku e meta pa pone énfasis riba e privilegio di ta biba na Kòrsou i tur e aspektonan positivo di nos isla. P’esei mes bo ta keda invitá pa demostrá esaki durante Karnaval tambe dor di dekorá bo stènt di Karnaval ku e logo di ‘Kòrsou ta dushi’. Huntu ku e logo mester inkluí un mensahe kòrtiku dikon pa abo Kòrsou ta dushi i asina partisipá pa gana premio atraktivo. Pa partisipá mester registrá promé ku djabièrnè 9 di febrüari 2018. Tuma e formulario di registrashon na CTB, Pietermaai 19 òf bishita e página di Facebook di Kòrsou ta dushi. Lo anunsiá e ganadornan 13 di febrüari 2018 riba e página di Facebook di Kòrsou ta dushi. Bishitá e página di Facebook i e wèpsait korsoutadushi.com pa asina bo tuma nota di e logo i kolonan ku bo mester uza i e reglanan di e kampaña. Bo tambe ta keda invitá pa durante Karnaval 2018 demostrá ku Kòrsou ta dushi. Bib’é. Stim’é!