Den novèmber e akshonnan ARUBA DOET, BON DOET i CURA DOET a kuminsá ofisialmente riba tur e tres islanan di nos Reino den sur di Karibe. Diferente organisashon lokal a kumisá ku e akshonnan den kolaborashon ku Oranje Fonds. Esaki ta un akshon anual den kua durente e di tres fin di siman di mart 2014 tur hende por dun’un man pa yuda kualke organisashon sosial komunitario ku tur sorto di pida pida trabou. Por trata por ehèmpel di fèrf un sentro di bario, limpia òf planta un hardin na un kas pa ansiano, organisá un keirumentu ku un grupo di persona inválido òf limpia un playa. Pa kada trabou Oranje Fonds ta pone un montante di sèn disponibel ku kua lo por kumpra fèrf òf por ehèmpel paga transporte. E proyekto akí tin tres aña ta kore ku éksito na Bonaire. Na 2013 tabatin 50 organisashon ku a inskribí 58 trabou, ku mas ku 1250 boluntario a kumpli pa kaba nan. E kantidat di boluntario ku ta ofresé nan yudansa mes ta mustra kon dushi esei ta i kuantu satisfakshon e ta duna:  e kantidat a krese di 750 pa mas ku 1250 den tres aña di tempu, ku ta un subida di kasi 70%. Aña pasá ARUBA DOET a partisipá pa promé biaha. Den e promé aña ei mesora nan tabatin mas ku 2350 boluntario ku a bai yuda 87 organisashon sosial komunitario. E aña akí a lansa CURA DOET ku presensia di diferente desena di organisashon, di Minister di Desaroyo Sosial, Labor i Bienestar, Sra. Fransisca, i di Sr. Van der Giessen, direktor di Oranje Fonds. Di awe te ku 31 di yanüari di 2014 tur organisashon komunitario por registrá nan trabounan pa kua nan mester di hende pa dun’un man, i pidi un aporte finansiero. Pa tur esei i pa mas informashon a lansa algun website spesial. Mira www.arubadoet.com, www.bondoet.com i www.curadoet.com. Na yanüari tur persona partikular, skol, empresa i otro organisashon tambe por kuminsá inskribí komo boluntario na e website nan ei.