Na luna di ougustus último Curaçao Sail Foundation a partisipá, na e reunión final di planifikashon di VELAS LATINOAMERICA 2018 (VLA 2018), e regata grandi rondó di América Latina, di kual Kórsou lo forma parti entre 15 – 18 di yüli 2018.

E reuniónnan na kual 14 pais di Latinoamérica, Europa i Asia a partisipá, a tuma lugá na Santiago (Chile) durante e dianan 8 – 10 di ougustus 2017 i a ser organisá dor di Armada di Chile.

Contraalmirante Guillermo Lüttges, presidente di e Comité Ehekutivo di VELAS 2018 a yama tur bonbiní i a agradesi tur país pa a hasi e esfuerso pa tabata presente; e la rekordá ku e motivashon pa bini huntu ta netamente pasobra e promé vershon na 2010 tabata asina exitoso, ku tur e Comandantenan i Hefenan di e Armadanan, a bai di akuerdo pa ripití e evento yamá “Velas Latinoamérica” kada 4 aña. E desishon aki a materialisá den e organisashon di Argentina pa VELAS 2014 i Chile pa VELAS 2018.

Contraalmirante Lüttges a señalá tambe, ku den e reunión final di planifikashon di e evento a inkorporá dos país nobo, Curazao/Kòrsou (ku haf di Willemstad) i Panamá (ku haf di Balboa). Tambe VLA 2018 tin konfirmashon di 12 tall ships, ku ta más ku den añanan anterior. E ta menshoná esaki ku orguyo, pasobra e vershon aki ku asina gran konvokatorio, ta ser asosiá ku e Bisentenario di Armada di Chile.

Durante e reunión nos a trata varios aspekto relashoná ku e ruta, e apoyo logistiko ku mester duna e flota di barkunan i tambe otro kordinashon nan general, pa asina por sigurá i optimalisá e aktividatnan ku e tripulantenan tur mester realisá den e diferente hafnan, ku nan ta bishitá.

Na e momentonan aki, e flota ta konsistí di 12 barku di bela grandi, ku lo bishitá un total di 17 haf e.o. Argentina, Brasil, Chile, Colombia, Kòrsou, Ecuador, Mexico, Panama, Peru, Republica Dominicana, Uruguay i Venezuela. Sin embargo, no ta tur barku ta bishitá tur haf; Kòrsou ta bai risibí 11 + un fragata di Marina Real! Ademas, esun nan ku ta bin, lo ta nos konekshon ku tur e país i hafnan kaminda nan ta pasa i mundo henter! Kiko mas nos ke?

Durante e dianan ku falta (± 175 só) CSF lo sigui informá nos komunidat i nos ta pidi tur komersiante i instanshanan ku por, pa yuda sostene nos Fundashon. Pa organisá un evento grandi asina’ki ta kosta hopi sen. Pero e promoshon ku nos pais lo haña globalmente, no ta nada kompará ku loke nos mester invertí.
Nos di CSF lo apresia tur sosten financiero ku nos por haña.
Pa mas informashon boso por bishita nos pagina nan riba facebook Fb/CuracaoSailFoundation i Fb/VelasLatinoamericaCuracao2018; tambe por bishita nos website www.tallshipscuracao.org. Pa mas informashon pa loke ta e regata Velas Latinoamérica 2018, por bishita www.velaslatinoamerica2018.cl.

Korsou ban habri nos kurason i risibi e barkunan aki. Ban mustra e tres mil sinku shen (3500) tripulante nan, ku no solamente nos tin un di e hafnan mas bunita di mundo, pero nos hendenan tambe; laganan sera konosi ku nos kultura i nos dushi hendenan. Laga pa nan ta é voseronan eifó, nos embahadornan, ku ounke nos ta chikí, pero grandi na mes momento. Di e forma aki nos por krese más i trese mas turista i asina yuda desaroyá nos economía.