WILLEMSTAD – Apesar di retonan grandi, fundashon Ride for the Roses Curaçao (RFTRC) por wak bèk ku satisfakshon riba éksito di e di 14 edishon di Ride, Swim & Walk for the Roses. Ku tur e aktividatnan ku ta forma parti di dje, inkluso Sail for the Roses i Spin for the Roses, e kantidat di partisipante ta laba atrobe serka di 10.000. E fondonan ku a generá ku e aktividatnan aki, huntu ku e kontribushon di patrosinadornan i un ehérsito di kolaborador i voluntario, lo alkansá atrobe den kareda di 500.000 florin. Esei ta atrobe un suma enorme ku komunidat di Kòrsou di bon kurason ta pone disponibel pa e lucha kontra kanser den man di fondo Prinsesa Wilhelmina (PWF).
Direktiva di fundashon RFTRC bou di presidente Robbin Martina, spònser prinsipal Orco Bank, spònsernan platinum Fundashon Bon Intenshon, Curaçao Port Services, Kooyman, AFAS, Kleinmoedig, Intertrust, PwC, Compliance & Forensic Services Caribbean, Guardian Group, Curaçao Airport Partners i Mambo Beach/BLVD, mas un kantidat grandi di patrosinadornan mas ku tambe ta masha apresiá – nan tur por wak bèk kontentu riba un evento grandioso.
Señal di salida
Djis despues di un áwaseru fuerte kòrtiku nèt 7 or di mainta, Minister Marilyn Alcalá-Wallé di Edukashon, Kultura i Deporte na Awasá a duna e señal di salida pa e Walk for the Roses. E i su koleganan minister Eugene Rhuggenaath i Steven Martina a kana e ruta largu di kasi 8 kilometer ku a pasa riba e brùg haltu Juliana pa atraves di Waaigat, Pèn i Mari Pompun kaba na Mambo Beach/BLVD. Tabatin tambe un ruta alternativo di 5 km pa kana for di Awasá riba brùg Emma pa Mambo Beach/BLVD. Na yegada e partisipantenan a risibí un bunita rosa; esei tabata ta warda e partisipantenan na e otro partinan deportivo tambe. E awa ku tabata kai de bes en kuando no a stroba; en efekto, el a duna poko alivio hasta. E kuater elementonan di kore baiskel tambe a kana zetá. Miéntras ku e kanadónan tabata drentando, pa 8 or e promé grupo di koredó di baiskel a sali pa e ruta di 60 km, eskoltá pa polis i ku Axel Cijntje den su baiskel di man. Poko despues a sigui e kareda di baiskel di 40 km, esun di 13 km pa mountain bikes i finalmente e grupo di Easy Ride di 10 km, pa Punda i bèk. Salida i final tabata na Mambo Beach/BLVD.
Spin for the Roses
Mientrastantu na Mambo Beach tabatin e popular Spin for the Roses kaminda gruponan ta kompetí ku otro riba hometrainer pa rekoudá mas tantu fondo posibel pa e bon kousa. Ku masha interes pa promé biaha hasi uso di kranking – drei e pedalnan ku man. Esei a resultá ideal pa esnan ku hèndikèp temporal òf permanente tambe por partisipá. Banda di 10 or konvoinan a kuminsá kore di Mambo Beach/BLVD pa Zanzibar/Jan Thiel kaminda djis despues di 12 or di mèrdia e landadónan kompetidor a sali promé, siguí pa e landadónan di rekreashon. Aki direktor Fernando da Costa Gomez di Curaçao Port Services, pa di 14 be patrosinador di e evento, a duna e señal di salida. E promé landadónan di kompetensia a drenta poko mas ku mei ora despues na Mambo Beach/BLVD. Henter dia tabatin hopi aktividat, músika i un bon ambiente na e playa di Mambo Beach. Despues a kuminsá pa pone tur kos bèk na òrdu pa entregá Mambo Beach/BLVD bèk limpi i bunita. Atrobe no tabatin niun insidente di seriedat durante henter e evento. Fundashon RFTRC ta gradesidu na tur partisipante, voluntario, patrosinador, polis, Krus Kòrá, VKC, Wild Hogs i tur e otronan pa nan kontribushon i ta konta ku nan koperashon atrobe pa otro aña ora ta prepará aktividatnan spesial en konekshon ku e di 15 edishon!