Willemstad – Por kuminsá for di aworakí ku diferente otro aktividat ekonómiko den e área di Schottegat banda di rafiná zeta. Futuro di henter e área di Schottegat mester kontribuí na krea kupo di trabou nobo i tambe bira i keda aksesibel pa pueblo di Kòrsou. Esaki a konkluí resientemente durante un mini konferensha ku Fundashon GreenTown a organisá. Konklushon ta ku mester averiguá kon por duna sosten na ambishonnan nobo pa Kòrsou dor di desaroyá e área di Schottegat. E mini konferensha aki a konta ku presensia di Minister Presidènt di Kòrsou Eugene Rhugenaath, Minister di Desaroyo Ekonómiko Steven Martina i nan kolaboradornan, algun miembro di MDPT i diferente eksperto riba tereno di Arkitektura, Planologia di siudat, Finansa i Desaroyo Duradero.

Presidente di Fundashon GreenTown, señor Ron Pin a presentá e vishon i ròl ku e organisashon aki tin komo fasilitadó i ‘denktank’. Sigun e presidente, Kòrsou mester tene kuenta ku e realidat di transishon di industria petrolero ku nos konosé na Kòrsou i tuma pasonan aworakí pa atendé ku e kambio aki na benefisio di nos isla. Di e forma aki, banda di krea kupo di trabou nobo por hasi e área atraktivo tambe pa e hopi Yunan di Kòrsou ku ta biba den eksterior ku ta deseá di regresá nan pais i partisipá den desaroyo di nan dushi Kòrsou. E Yu di Kòrsou, ingeniero i arkitekto señor Rido Pin, ku tin hopi aña ta traha na Oustralia, a presentá un ‘Case Study’ kon nan a realisá e transishon aki di un proyekto eksistente den e haf di Sydney. Ta remarkabel ku e hafnan di Sydney ta hopi paresido na esnan di Kòrsou. Huntu ku e habitantenan di Sydney nan a duna kontenido na desaroyo di e área kaminda tin kompanianan internashonal a establesé nan mes. Señor Rido Pin a amplia i elaborá riba su eksperensianan personal di Sydney pa mustra asina e oportunidatnan ku tin aworakí na Kòrsou banda di e refineria.

Durante e mini konferensha Minister Presidènt Rhuggenaath, Minister Martina, miembronan di MDPT i ekspertonan presente a interkambiá ku otro riba puntonan balioso, a base di nan ideanan i ekspertisio. Minister Presidènt Rhuggenaath ta aploudí i ta empoderá tambe e inisiativa di Fundashon GreenTown pa embolbí komunidat, eksperto i profeshonalnan den e proseso aki. Minister Presidènt a duna di konosé tambe ku lo e konsiderá sigur e proposishonnan ku a bini dilanti ku ta komplementario pa kontribuí na e maneho di gobièrnu di sigui ku aktividatnan di refineria ku ta nesesario den periodo di transishon pa un futuro mas sostenibel. E pensamentu di inklusividat di Fundashon GreenTown pa embolbí tur hende den esaki ta kuadra ku e aserkamentu di e aktual gobièrnu. Aktualmente Fundashon GreenTown ta trahando aworakí pa amplia nan kontribushon na e trayekto di transishon aki pa asina realisá sosten, dialogá i proposishonnan riba tereno di desaroyo duradero di e área di Schottegat.