WILLEMSTAD— E di sinku edishon di e akshon boluntario mas grandi na Kòrsou, CURA DOET, lo bolbe tuma lugá e aña aki riba dia 9 i 10 di mart 2018. E periodo di inskripshon pa organisashonnan sosial ta sera djabièrne awor dia 12 di yanüari 2018. Pues Curaçao Cares, e organisadó di CURA DOET, ta hasi un yamada na tur organisashon sosial, di deporte, di bario, skolnan i otro kousanan sosial pa bishitá www.curadoet.com i kompletá inskripshon via di e wèpsait. Organisashonnan i inisiativanan sosial ku mester di yudansa pa inskribí nan tarea òf aktividat riba e wèpsait por pasa na ofisina di Curaçao Cares entre 9 or-5 or di atardi te ku dia 12 di yanüari 2018.
Aña pasá un total di 213 organisashon sosial rònt Kòrsou a partisipá na CURA DOET i mas o menos 5000 boluntario a duna un man durante e dos dianan den mart. “Den kuadro di nos selebrashon di 5 aña, tin espasio pa 250 organisashon sosial partisipá i nos lo kier pa tur organisashon hasi uso di e oportunidat di por haña un donashon di 1,100 florin máksimo pa kumpli ku nan deseo, pues organisashonnan sosial no mester pèrdè e chèns ei”, segun lider di proyekto Vicky Trinidad. Ku e donashon i yudansa di boluntarionan un organisashon por logra diferente meta, por ehèmpèl drecha luga pa mucha hunga, kura di skol, hasi e espasio mas bèrdè dor di planta mata òf organisá un dia ekstraordinario pa grandinan.
Por lesa tur e rekisitonan pa bini na remarke pa e donashon aki riba www.curadoet.com. Un organisashon por krea un profil, inskribí un proyekto i tambe hasi petishon finansiero via di e wèpsait mes. Pa tur organisashon nobo ku lo kier hasi mas pregunta of mester di guia pa inskribí e proyekto, por email curadoet@curacaocares.org i tambe pasa na ofisina di Curaçao Cares, situá na Van Raderstraat 13-15 den Scharloo, entre 9 or I 5 or di atardi. Tambe por yama te ku djabièrne na 788-1952 entere 9 or i 5 or di atardi.
Boluntarionan interesá pa duna un man tambe por kuminsa bishitá e website pa skohe un proyekto pa sostené den 2018. Un yamada na organisashonan i boluntarionan pa bishita www.curadoet.com awe mes!