WILLEMSTAD – Despues di a lansa e kantika ‘KOMBERSA KU KUNÉ’, Stanley Clementina ta sumergí den e preparashonnan pa Festival di Tumba 2018. Ta e promé biaha ku e talentoso kantante i kompositor ta partisipá na e festival históriko, kual a bira un rito di pasahe pa tur artista kurasoleño di tanda ku ke laga su marka.
Durante e dianan di fiesta na Kòrsou, Stanley a presenta na varios establesimentu manera Karákter i Sta. Bárbara i fiestanan popular manera Jet Set. Ya tin hopi antisipashon pa e tumba di Stanley, ku e mes a skirbi, produsí i komponé. E areglo di e tumba a keda kompletá huntu ku e talentoso músiko i areglista Derryl ‘Titi’ de Palm, i Stanley lo keda akompañá pa e banda ONE. “Aunke mi no por divulga hopi, mi tumba lo tin un mensahe bunita i alabes lo laga bo pensa. Tambe lo bo rekonosé mi signatura Afro den mi komposishon, kual lo pone un i tur riba pia”, Stanley ta primintí.

Mientrastantu, e albùm di Afrobeat tan antisipá di Stanley, titula YDK, ta kla. YDK lo sali dirèkt despues di Festival di Tumba 2018 i lo inkluí ‘KOMBERSA KU KUNÉ’, kua ta e di sinku produkshon di Stanley komo solista. Según Stanley, tin biaha sirkunstansia di bida ta pone ku bo ta atmirá un hende djaleu, pero bo no por formula e palabra nan pa aserk’e. Den ‘KOMBERSA KU KUNÉ’, esei ta e dilema di e protagonista ku ke purba kapta atenshon di un damita bon bala. Den e kansion, Stanley ta motivé, riba un manera humorístiko, p’e tin kurashi i ta atvertí p’e no rabia ora otro pasa su dilanti i probechá di e oportunidat. Según Stanley, ‘KOMBERSA KU KUNÉ’ tambe ke ilustra un dinámiko simbóliko, unda e muhé ta representa bida real, unda hopi biaha nos por laga un oportunidat bai, paso nos no ke tumá un kurashi. ‘KOMBERSA KU KUNÉ’ a keda komponé pa Stanley, di meks pa produktor Zúrich Musiq, i e klip a keda dirigí pa Cineterra.
Pues ‘like’ su Facebook.com/StanleyAcoustic pa keda na altura di tur demas presentashon durante e temporada di Karnaval.
Pa presentashon durante e periodo karnavalístiko, mail steezmusic@gmail.com of chéck www.stanleyclementina.com
Por chéck e video di ‘KOMBERSA KU KUNÉ’ riba YouTube na e siguiente link: https://www.youtube.com/watch?v=T_oDgzdkFMk&feature=youtu.be