Klientenan ku Tracheostoma tambe ta bon biní.

 Dia 26 di òktober último, Fundashon ROSA, e organisashon di pashèntnan ku Stoma, a inougurá su sentro na Scharlooweg 23. Meta di e sentro aki ta pa duna sosten i guia na tantu pashèntnan eksistente komo na personanan, ku a keda diagnostiká i ku ta den proseso pa risibí un Stoma.  A tuma Fundashon ROSA hopi tempu, pero porfin e ta disponé di su propio lokalidat, kaminda e por duna un servisio mas adekuá i optimal na personanan ku tin un Stoma.

Konsulta ku Enfermero Speshalisá

Di inmediato, riba tur djamars atardi di 2.30’or pa 4.30’or Fundashon ROSA tin konsultá habri ku un enfermero speshalisá, pa atendé ku pashèntnan di Stoma i nan famia. Durante e konsulta aki, klientenan ku tin kualke problema òf famianan ku tin kualke preokupashon, por diskutí esaki ku e Enfermero. Tambe riba tur djaweps di 9’or di mainta pa 12’or di mèrdia tin un mainta di informashon, kaminda ta duna informashon i guia, alabes pa kontestá kualke pregunta ku un kliente òf su famia por tin tokante Stoma. Tantu e konsulta komo e mainta di informashon ta tantu pa klientenan eksistente komo personanan ku ta den proseso pa risibí un Stoma. Hopi biaha nos no ta realisá, pero ora un persona risibí un Stoma, hopi kos ta kambia den su bida. E sosten moral i e kuido na kas ta di sumo importansha, ta p’esei Fundashon ROSA ta pone hopi énfasis riba e guia i duna informashon na e famia ku ta esun ku tin e kuido di e pashènt den man.

Aktividatnan pa Kliente

Kuminsando tur djaluna mainta di 9’or pa 12’or di mèrdia tin un mainta di terapia, kaminda ta siña e klientenan kon pa traha obra di man. E aktividat aki ta bou di guia di señora Esseline Sambre. Pa awor e aktividat aki ta un biaha pa siman, pero dependiendo di e interes lo por ekspandé e mainta di terapia ku mas dia i ku otro tipo di aktividat. Tambe riba tur di dos djasabra di luna Fundashon ROSA ta tene un enkuentro ku su klientenan. Durante e enkuentro aki tin e posibilidat pa klientenan por papia ku otro, i siña for di eksperiensha di otro ku ta den mesun situashon i ku segun tempu a siña biba ku un Stoma. Durante e mainta e mainta aki ta tene charla, forma diskushon i tambe hasi un rekorido ku e klientenan. Fundashon ROSA ta afiliá na “International Ostomy Association”, e organisashon mundial pa pashèntnan di stoma. Direktiva di Fundashon ROSA ke hasi un invitashon na tur pashènt di Stoma pa nan pas riba e dianan indiká pa sera konosí ku e sentro. Fundashon ROSA tei pa yuda bo tambe.