WILLEMSTAD – Djabièrnè awor dia 22 di novèmber ta dia di músiko. Mirando ku djabièrnè ta un dia ku hopi di nos músikonan ta okupá, miembronan a opta pa tene e selebrashon aki djamars dia 26 di novèmber próksimo den Curaçao Festival Center. E aña aki e fecha históriko aki lo keda selebrá den un forma distinto, durante kua lo bai tin algun aktonan importante i memorabel, na kua tur músiko i miembro mester partisipá. Aparte di e entrega di premionan Edgar Supriano na enkargo di Sra. Nilda Supriano ku e aña aki ta bai pa Sonos Band, Lucien Alberg, Johnny Cornelia i Happy Peanuts, miéntras ku e Pen di Mérito 2013 ta bai pa Rignald Recordino, Rignald Yankee di Kor Orfeon Alegre i Sra. Sixta Rooi di Pax Christi, Kor di Barber. Durante di e anochi ei lo tin e partinan ofisial ku nos lo bai menshoná akontinuashon den kuadro di selebrashon 45 aña AMAK. Desvelo di bòrchi riba Edifisio di den Klave.  Pa duna realse honor i rèspèt na un gran baluarte, e anochi aki lo kombertí e nòmber di Den Klave den nòmber di un gran baluarte. E desvelo lo ta na enkargo di e baluarte i Promé Minister di Kòrsou. Desvelo di Potrètnan di Mr. Newburn Patrick d.f.m.  i Peng de Windt d.f.m. den sala Newburn Patricks. E artista músiko Wotty de la Nooy a haña e enkargo pa traha e potrètnan aki ku material di koper den relief. Aki nan tambe lo tin un parti seremonia, kaminda e desvelo lo ta na enkarga di un miembro di famia i e eskultor artista Watty de la Nooy. Medaya pa pioneronan. Un parti importante di  selebrashon ta na momentu ku ta bai honra e músikonan  pionero na bida ku a partisipá den e akshon di yanüari 1973, kaminda un grupo di alrededor di 50 persona ku a marcha  di Arbeidszorg na Penstraat  pa Bestuurscollege. Direktiva di AMAK ta hasi un súplika na tur e miembronan ku a partisipá na e akshon ei, pa pasa na Curaçao Festival Center i registrá nan nòmber serka Sr. Specht o yama 737-6368. E intenshon ta pa tur e pioneronan aki risibí un medaya di rekonosementu pa nan aporte i sosten na 1973. Entrega di Buki 42 aña Festival di Tumba di Karnaval di Kòrsou.  Durante e anochi aki Sr. Feleo Colinet lo entrega e promé ehemplarnan na Minister Presidente i alabes Minister di Kultura Drs. Ivar Asjes na Sr. Edsel Papy Jesurun, eks Diputado di Kultura i e mandatario ku a otorgá e derechonan di Festival di Tumba na AMAK i Presidente di AMAK. Direktiva di AMAK ta konta ku partisipashon di Músikonan miembro na e selebrashon grandi aki di  Dia di Músiko 2013 kombiná ku 45 aña AMAK, djamars awor den Curaçao Festival Center kuminsando pa 7 or di anochi. Direktiva ta konta ku boso!