WILLEMSTAD/ ROTTERDAM – Tin biaha sirkunstansia di bida ta pone ku bo ta atmirá un hende djaleu, pero bo no por formula e palabrona pa aserka. Den KOMBERSA KU KUNÉ’, esei ta e dilema di e protagonista ku ke purba kapta atenshon di un damita bon bala. Den e kansion, Stanley Clementina ta motivé pe tin kurashi i ta atvertí p’e no rabia ora otro pasa su dilanti i bai ku n’e.
KOMBERSA KU KUNÉ’, ta e di sinku produkshon di Stanley Clementina, unda riba un manera humorístiko, e talentoso kantante i kompositor, ke motiva bo pa no laga niun chèns bai, paso despues lo bo lamenta. “Tin hopi hòmber ku ta para wak i atmirá un dama, pero nunka ta hasí algu. Nan no ta ni aserk’e i dun’e un kòmplimènt”, Stanley a splika. “Nan ta keda wak i hari so”. E kansion tambe ke ilustra un dinámiko simbóliko, unda e muhé ta representa bida real.

Hopi biaha nos por laga un oportunidat bai, paso nos no ke tumá un kurashi. KOMBERSA KU KUNÉ’ a keda komponé pa Stanley, di meks pa produktor Zurich Musiq, i e clip a keda dirigí pa Cineterra. Mientrastantu, e albùm di Afrobeat tan antisipá di Stanley, titula YDK, ta kla. YDK lo sali dirèkt despues di Festival di Tumba 2018. Pa promé biaha Stanley lo partisipá n’e festival, manera ya ta tradishon pa varios artista kurasoleño di tanda. Ya tin hopi antisipashon pa e tumba di Stanley, ku e mes a skirbi, produsí i komponé. E areglo di e tumba a keda kompletá huntu ku e talentoso músiko i areglista Derryl ‘Titi’ de Palm. Durante e dianan di fiesta, Stanley lo ta na Kòrsou algun siman, unda e lo tin varios presentashon. Dia 30 di desèmber lo e presenta na Sta. Bárbara, i dia 4 yanüari lo e ta na Club 973, na Mambo Beach. Pues ‘like’ su Facebook.com/StanleyAcoustic pa keda na altura di tur demas presentashon. Pa presentashon, mail steezmusic@gmail.com of chéck www.stanleyclementina.com. Por chéck e video di KOMBERSA KU KUNÉ’ riba YouTube na e siguiente link: https://www.youtube.com/watch?v=T_oDgzdkFMk&feature=youtu.be